Chilonzor tuman Uy-joy va kommunal xizmat ko‘rsatish bo‘limi boshlig‘i Sadikov Sherzod Karimjanovich tomonidan O‘zbekiston Respublikasi Prezidentining 2026-yil 5-fevraldagi “Ko‘p kvartirali uylarni boshqarish tizimini yanada takomillashtirish bo‘yicha qo‘shimcha chora-tadbirlar to‘g‘risida”gi PQ-48-son qarori ijrosi yuzasidan hisobot berildi.
Hisobotda 2026-yilda Chilonzor tumanidagi ko‘p kvartirali uylar tutash hududlarini obodonlashtirish bo‘yicha amalga oshiriladigan ishlar haqida ma’lumot berildi. Jumladan:
🔹 20 ta bolalar maydonchasini qurish uchun 6 mlrd 707 mln so‘m;
🔹 1 906 p/metr irrigatsiya tarmoqlarini ta’mirlash uchun 1 mlrd 48,3 mln so‘m;
🔹 4 963 pogon metr yo‘laklarni asfaltlash uchun 595,5 mln so‘m mablag‘ ajratilgan.
Shuningdek, ko‘p qavatli uy-joy fondining kuz-qish mavsumiga tayyorgarligi doirasida uylarning ichki muhandislik tizimlarini yangilash uchun 4 mlrd 431,5 mln so‘m mablag‘ yo‘naltirilishi belgilangan.
Energiya samaradorligini oshirish maqsadida Toshkent shahrida “Chinoz va Oltiariq” tajribasi asosida Chilonzor tumanidagi 5 ta ko‘p kvartirali uyda fasadlarni bazalt qoplamasi bilan qoplash, tom qismini izolyatsiya qilish, oynalarni yangilash va boshqa energiya tejamkor tadbirlarni amalga oshirish uchun jami 11 mlrd 550,5 mln so‘m mablag‘ ko‘zda tutilgan.
Mazkur chora-tadbirlarning asosiy maqsadi — ko‘p kvartirali uylarning texnik holatini yaxshilash, hududlarni obodonlashtirish, muhandislik-kommunikatsiya tizimlarini yangilash hamda fuqarolar uchun yanada qulay, xavfsiz va zamonaviy yashash muhitini yaratishdan iborat.