Xalq deputatlari Chilonzor tumani Kengashi deputati, O‘zbekiston Ekologik partiyasi a’zosi Fayzullayeva Malika Yarkunovna tomonidan tumandagi 33-son oilaviy poliklinikada DMED — raqamli tibbiy axborot tizimining joriy etilishi, undan foydalanish samaradorligi hamda bemorlarga tibbiy xizmat ko‘rsatish jarayoniga ta’siri o‘rganildi.
O‘rganish jarayonida DMED tizimining bir qator ijobiy jihatlari qayd etildi. Xususan, Yo‘riqnomaning 11-bandiga muvofiq, bemorning JSHSHIR, tashxis va tibbiy ko‘rsatkichlari, laboratoriya hamda instrumental tahlil natijalari, elektron retseptlar, ambulator va statsionar davolanishga oid ma’lumotlarni elektron tibbiy kartaga real vaqt rejimida kiritish hamda boshqa tegishli modullarga avtomatik uzatish imkoniyati mavjud.
Shu bilan birga, o‘rganish davomida amaliyotda ayrim muammoli jihatlar ham mavjudligi aniqlandi. Xususan, poliklinikada bemor qabuliga ajratilayotgan 15 daqiqalik normativ vaqt shifokorning bemorni ko‘rikdan o‘tkazishi bilan bir qatorda DMED tizimiga zarur tibbiy ma’lumotlarni kiritishi, tashxis, tahlil natijalari, tayinlovlar va boshqa elektron hujjatlarni rasmiylashtirishi zarurati bilan bog‘liq qo‘shimcha yuklamani yuzaga keltirmoqda.
Natijada ayrim hollarda shifokor uchun bemor bilan bevosita muloqot qilish, shikoyatlarini batafsil tinglash va tibbiy holatini chuqur baholash uchun vaqt qisqarishi, navbatlarning yuzaga kelishi hamda qabul jarayonida vaqt taqsimoti bilan bog‘liq qiyinchiliklar kuzatilishi mumkinligi qayd etildi.
Deputatlik nazoratining asosiy maqsadi — raqamlashtirish jarayonlarini qo‘llab-quvvatlagan holda, uning avvalo bemor uchun qulayligi, shifokor faoliyati samaradorligi va tibbiy xizmat sifatiga ijobiy ta’sir ko‘rsatishini ta’minlashdan iborat.