O‘zbekiston Respublikasi Vazirlar Mahkamasining 2020-yil 20-fevraldagi 104-sonli “Tashqi reklama bozorini tartibga solish to‘g‘risida”gi qarori bilan tashqi reklama sohasidagi munosabatlarni tartibga solish, reklama obyektlarini joylashtirish jarayonlarini takomillashtirish hamda ushbu yo‘nalishda yagona va tizimli yondashuvni joriy etish bo‘yicha muhim vazifalar belgilangan.

Mazkur qarorning asosiy maqsadi tashqi reklama vositalarini joylashtirishda qonuniylik, shaffoflik va tartibni ta’minlash, hududlarning me’moriy qiyofasini saqlash hamda tadbirkorlik subyektlari uchun qulay reklama bozorini shakllantirishdan iborat.

Qarorga muvofiq, tashqi reklama obyektlarini joylashtirishda shaharsozlik va arxitektura talablari, hududlarning estetik ko‘rinishi hamda xavfsizlik me’yorlariga rioya etilishi belgilangan. Reklama vositalari aholi uchun qulaylik yaratishi, atrof-muhit va bino-inshootlarning umumiy ko‘rinishiga salbiy ta’sir ko‘rsatmasligi lozim.

Shuningdek, hujjatda:

• tashqi reklama sohasidagi munosabatlarni tartibga solish va reklama obyektlarini joylashtirish tizimini takomillashtirish;
• tashqi reklama obyektlaridan foydalanish va ularni belgilangan talablar asosida joylashtirish;
• reklama vositalarining shaharsozlik, arxitektura hamda hududlarning estetik qiyofasiga uyg‘unligini ta’minlash;
• tadbirkorlik subyektlari uchun shaffof va sog‘lom raqobat muhitini yaratish;
• hududlarning tashqi ko‘rinishini yanada obod, tartibli va zamonaviy holga keltirish kabi vazifalar nazarda tutilgan.

Tashqi reklama vositalarini amaldagi qonunchilik talablari asosida joylashtirish reklama bozorining rivojlanishiga, tadbirkorlik faoliyati uchun qulay sharoitlar yaratilishiga hamda shahar va tumanlarning zamonaviy qiyofasini shakllantirishga xizmat qiladi.

📌 Asos: O‘zbekiston Respublikasi Vazirlar Mahkamasining 2020-yil 20-fevraldagi “Tashqi reklama bozorini tartibga solish to‘g‘risida”gi 104-sonli qarori