Xalq deputatlari Termiz shahar Kengashining 12-“Saxovat” saylov okrugi deputati X.Jurayev o‘z saylov okrugiga qarashli “Tinchlik” mahallasida bo‘lib, fuqarolar uchun navbatdagi sayyor qabul va ochiq muloqot o‘tkazdi.
Mazkur uchrashuv mahalliy Kengash deputatlari faoliyatining eng muhim 24 ta yo‘nalishi doirasida tashkil etilib, unda aholini qiynayotgan dolzarb masalalarni o‘rganish, murojaatlarni bevosita joyiga chiqib ko‘rib chiqish hamda ularning yechimi yuzasidan amaliy choralarni belgilashga alohida e’tibor qaratildi.
Qabul davomida fuqarolar tomonidan ishga joylashtirish, moddiy yordam ajratish, ijtimoiy himoyaga muhtoj oilalarni qo‘llab-quvvatlash, bandlikni ta’minlash hamda turmush sharoitini yaxshilash bilan bog‘liq qator murojaatlar bildirildi. Har bir murojaat deputat tomonidan atroflicha tinglanib, ularning mazmuni yuzasidan batafsil suhbat olib borildi.
Murojaatlarning ayrimlari yuzasidan fuqarolarga amaldagi qonunchilik talablari asosida huquqiy tushuntirish va tavsiyalar berildi. Qo‘shimcha o‘rganish hamda tegishli mutasaddi tashkilotlar ishtirokini talab etadigan masalalar deputat nazoratiga olinib, ularning ijrosini ta’minlash bo‘yicha mas’ul idoralarga tegishli tartibda yo‘naltirilishi belgilandi.
Uchrashuv davomida mahalla aholisining fikr-mulohazalari, takliflari va tashabbuslari ham tinglanib, hududni yanada obod qilish, aholining ijtimoiy himoyasini kuchaytirish, bandlikni ta’minlash hamda fuqarolarni qiynayotgan muammolarni bosqichma-bosqich bartaraf etish masalalari yuzasidan fikr almashildi.
Ta’kidlanganidek, deputatlarning saylovchilar bilan muntazam uchrashuvlari fuqarolar murojaatlarini o‘z vaqtida o‘rganish, ularning qonuniy manfaatlarini himoya qilish, hududdagi mavjud muammolarni aniqlash va tegishli tashkilotlar bilan hamkorlikda samarali hal etishda muhim o‘rin tutadi. Bunday ochiq muloqotlar davlat organlari va aholi o‘rtasidagi hamkorlikni yanada mustahkamlash, xalq manfaatlarini ta’minlash hamda deputatlik nazoratining amaliy samaradorligini oshirishga xizmat qilmoqda.