Mahallada yoshlarning o‘rni - tajriba, mas’uliyat va yangi yondashuvlar

 📇 Xalq deputatlari Uchtepa tumani Kengashi huzuridagi “Yoshlar maslahat guruhi” a’zolari uchun “Ko‘kcha Oqtepa” MFY binosida muhim va mazmunli seminar tashkil etildi. Unda tuman Kengashining "8-Ko'kcha-Oqtepa" okrugi deputati, mahalla raisi Sobitjon Imamov tomonidan “Mahallada yoshlarning o‘rni” mavzusida atroflicha ma’ruza qilindi.

 Seminar davomida mahalla tizimida yoshlarning faolligini oshirish, ularni ijtimoiy hayotga keng jalb etish, tashabbuskorlikni qo‘llab-quvvatlash masalalari chuqur tahlil qilindi. Ayniqsa, ustoz-shogird an’analarini rivojlantirish, mahalladagi yoshlar yetakchilari faoliyatini takomillashtirish va ularning jamiyatdagi rolini kuchaytirish bugungi kunning dolzarb yo‘nalishlaridan biri sifatida qayd etildi.

Ta’kidlanganidek, so‘nggi yillarda O‘zbekiston Respublikasi Oliy Majlisi Senati tomonidan qabul qilinayotgan qarorlar asosida yoshlar masalasiga bo‘lgan e’tibor yanada kuchaymoqda. Bu esa joylarda, xususan mahallalarda yoshlar bilan ishlash tizimini yangi bosqichga olib chiqishga xizmat qilmoqda.

Seminarda yoshlarning bo‘sh vaqtini mazmunli tashkil etish, ularni kasb-hunarga yo‘naltirish, ijtimoiy muammolarni barvaqt aniqlash va hal etishda yoshlar yetakchilarining o‘rni alohida muhokama qilindi. Shuningdek, yoshlarning tashabbuslarini qo‘llab-quvvatlash orqali mahallada sog‘lom ijtimoiy muhitni shakllantirish masalalariga ham e’tibor qaratildi.

Mazkur tadbirda tuman deputatlari ham faol ishtirok etib, yoshlar siyosatini joylarda samarali amalga oshirish yuzasidan o‘z fikr va takliflarini bildirdilar. Ularning ta’kidlashicha, bugungi kunda yoshlar bilan ishlash — bu faqatgina targ‘ibot emas, balki aniq tizimli yondashuv, doimiy muloqot va amaliy yordamni talab etadi.

Yakuniy xulosalarga ko‘ra, bunday seminarlar yoshlarning ijtimoiy faolligini oshirish, ularni mahalla hayotining faol ishtirokchisiga aylantirish hamda kelajakda yetuk, mas’uliyatli kadrlar sifatida shakllanishida muhim ahamiyat kasb etadi.