Deputat tomonidan yoshlarga o‘z biznesini yo‘lga qo‘yishda e’tibor qaratilishi lozim bo‘lgan, biznes-reja tuzish, bozorni o‘rganish, moliyaviy resurslardan oqilona foydalanish hamda qonunchilik talablariga rioya etish yuzasidan tushuncha va tavsiyalar berildi. Shuningdek, mamlakatimizda yoshlarni tadbirkorlikka keng jalb etish, ularni qo‘llab-quvvatlash, zarur shart-sharoitlar yaratish borasida amalga oshirilayotgan islohotlar, davlat dasturlari haqida ham ma’lumotlar taqdim etildi. Uchrashuv yakunida mahallada faoliyat yuritayotgan, imtiyozli ajratilgan kredit mablag‘lari asosida mebel ishlab chiqarish sexini tashkil etgan yosh tadbirkor faoliyati bilan tanishildi. Tadbirkorning faoliyati ko‘zdan kechirilib, uning ish tajribasi yoshlarga namuna sifatida ko‘rsatildi.