Xalq deputatlari Ishtixon tumani Kengashining navbatdagi sessiyasida O‘zbekiston Respublikasi Prezidentining 2026-yil 5-fevraldagi PQ-48-son Qarori ijrosi yuzasidan tumanda amalga oshiriladigan ishlar muhokama qilinib, dastlabki manzilli ro‘yxat tasdiqlandi.

Mazkur qarorga asosan, ko‘p kvartirali uylarni ta’mirlash, rekonstruksiya qilish hamda tutash hududlarni obodonlashtirish ishlari keng ko‘lamda tashkil etilishi belgilangan.

Xususan, 2026–2027-yillarga mo‘ljallangan dastur doirasida Xalqobod MFY hududida joylashgan ko‘p kvartirali uylar atrofida 353 mln so‘m mablag‘ evaziga zamonaviy bolalar maydonchasi qurilishi rejalashtirilgan.

Shuningdek, 2026-yilda mahalliy byudjet va boshqaruv servis kompaniyalari mablag‘lari hisobidan qator uy-joylarda ta’mirlash ishlari amalga oshiriladi. Jumladan:

O‘zbekiston MFYdagi 2 ta ko‘p kvartirali uyda kirish yo‘laklari va elektr shitlari yangilanadi,

Q.Qarshiyev MFYda kirish yo‘laklari ta’mirlanadi,

Ko‘tarma MFYdagi uy-joylarga kodli qulflar va energiya tejamkor yoritish vositalari o‘rnatiladi.

Mazkur ishlarni amalga oshirish uchun jami 63 mln so‘m mablag‘ yo‘naltirilishi rejalashtirilgan bo‘lib, uning 50 foizi mahalliy byudjet, 50 foizi esa boshqaruv servis kompaniyalari hisobidan qoplanadi.

Sessiyada ushbu yo‘nalishda ishlarni samarali tashkil etish, aholiga qulay va xavfsiz yashash muhitini yaratish yuzasidan tegishli vazifalar belgilandi.

Kun tartibidagi masala yuzasidan deputatlar tomonidan dastlabki manzilli ro‘yxat tasdiqlandi.