Qonun ustuvorligi — faoliyat samaradorligining asosi. 

Xalq deputatlari Quva tuman Kengashi raisi Z.Ashurov tomonidan tuman Kengashi
deputatlari hamda Kengash huzuridagi Yoshlar maslahat guruhi vakillari
ishtirokida qonun talablarini chuqur oʻrganishga qaratilgan navbatdagi
yigʻilish oʻtkazildi. Unda deputatlarning huquqiy bilimlarini yanada
mustahkamlash, amaldagi qonun hujjatlarini toʻgʻri qoʻllash hamda faoliyat
samaradorligini oshirish masalalariga alohida eʼtibor qaratildi.  

Yigʻilishda Kengash raisi Z.Ashurov hamda Kengash kotibiyati mudiri R.Nodirovlar tomonidan
deputatlarga Oʻzbekiston Respublikasining 2022-yil 29-sentyabrda qabul qilingan
“Elektron tijorat toʻgʻrisida”gi OʻRQ-792-son Qonuni hamda 1996-yil
29-avgustdagi “Fuqarolar sogʻligʻini saqlash toʻgʻrisida”gi OʻRQ-265-I-son
Qonunining mazmun-mohiyati batafsil tushuntirildi. 

Xususan, “Elektron tijorat toʻgʻrisida”gi Qonunda raqamli iqtisodiyot sharoitida savdo
munosabatlarini tartibga solish, elektron shartnomalar tuzish,
ishtirokchilarning huquq va majburiyatlari hamda xavfsizlik masalalariga doir
muhim jihatlar yoritildi. 

Shuningdek, “Fuqarolar sogʻligʻini saqlash toʻgʻrisida”gi Qonunda aholi salomatligini
muhofaza qilish, tibbiy xizmatlar sifatini oshirish va fuqarolarning sogʻliqni
saqlash sohasidagi huquqlarini taʼminlash boʻyicha asosiy normalar tushuntirib
oʻtildi. 

Yigʻilish yakunida deputatlar tomonidan qonun hujjatlarini amaliyotga samarali tatbiq
etish, aholi oʻrtasida huquqiy targʻibot ishlarini kuchaytirish hamda
sohalardagi mavjud muammolarni bartaraf etish yuzasidan fikr-mulohazalar
bildirildi.