Sifat va masʼuliyat — qurilishning asosiy mezoni
Har qanday qurilish loyihasining muvaffaqiyati faqat yangi bino yoki zamonaviy jihozlar bilan o‘lchanmaydi. Uning asosiy mezonlari — bajarilgan ishlarning sifati, belgilangan muddatlarga rioya qilinishi va fuqarolar uchun yaratilgan qulayliklardir.
Shu maqsadda Xalq deputatlari tuman kengashi deputati N. Ismatova «Agrobank» ATB Do‘stlik filialida olib borilayotgan qurilish ishlari bilan joyida tanishdi. O‘rganish jarayonida ishlarning loyiha talablariga mosligi, qurilish materiallarining sifati va mehnat xavfsizligi qoidalariga amal qilinishi diqqat markazida bo‘ldi.
Deputat qurilish ishlarining o‘z vaqtida bajarilishi masalasiga alohida eʼtibor qaratdi. Chunki muddatlarning cho‘zilishi nafaqat xarajatlarning oshishiga, balki aholi va tadbirkorlarga ko‘rsatiladigan bank xizmatlarining qulayligiga ham taʼsir qiladi.