🔹O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya asosida Xalq deputatlari Marg‘ilon shahar Kengashi deputati, shahar hokimi E. Rustamov 10-Bobur saylov okrugi hududidagi “Yovqochar” mahallasida bo‘lib, oilalarning ijtimoiy-iqtisodiy sharoitini xonadonbay o‘rgandi.

🔹O‘rganish jarayonida, avvalo, kambag‘allikni qisqartirish va aholi bandligini ta’minlash borasida belgilangan vazifalarning mahalla darajasidagi ijrosi tahlil qilindi. Kambag‘allik reyestrida qayd etilgan xonadonlarning daromad manbalari, bandlik holati, mavjud muammolari hamda qo‘shimcha ko‘makka bo‘lgan ehtiyojlari atroflicha ko‘rib chiqildi.

🔹Fuqarolar bilan yuzma-yuz muloqot davomida har bir oilaning mavjud imkoniyatlari, mehnat salohiyati va ehtiyojlaridan kelib chiqib, ularni qo‘llab-quvvatlashning aniq yo‘nalishlariga e’tibor qaratildi. Maqsad faqat mavjud muammoni aniqlash emas, balki oilaning barqaror daromad manbaiga ega bo‘lishi uchun amaliy imkoniyatlarni ishga solishdan iborat bo‘ldi.

🔹Xususan, ish izlayotgan fuqarolarni mavjud bo‘sh ish o‘rinlariga yo‘naltirish, mehnat bozorida talab yuqori bo‘lgan kasblarga o‘qitish, o‘zini o‘zi band qilish hamda tadbirkorlik faoliyatini yo‘lga qo‘yish orqali oilalar daromadini oshirish masalalari muhokama qilindi.

🔹Xonadonbay o‘rganishlar davomida aniqlangan har bir masalaga individual yondashish, fuqarolarning murojaatlarini tegishli tashkilotlar bilan hamkorlikda hal etish va belgilangan vazifalar ijrosini nazoratga olish muhim yo‘nalish sifatida qayd etildi.

🔹Bunday deputatlik o‘rganishlari mahallalarda kambag‘allikni qisqartirish, aholi bandligini ta’minlash va oilalarning daromadlarini oshirishga qaratilgan davlat siyosatining amaliy natijadorligini ta’minlashda muhim ahamiyat kasb etmoqda.