Xalq deputatlari Termiz tuman Kengashi 5-Uchqizil saylov okrugi deputati Sh.Norsayev tomonidan o‘zi saylangan hudud fuqarolari bilan uchrashuv o‘tkazildi. Unda mahalla raisi, mahalla faollari hamda fuqarolar faol ishtirok etdi.

Uchrashuv davomida hududni ijtimoiy-iqtisodiy rivojlantirish, aholi farovonligini oshirish, mahallada amalga oshirilayotgan ishlar hamda kelgusidagi ustuvor vazifalar yuzasidan fikr almashildi. Fuqarolar tomonidan hududdagi elektr ta’minotini yaxshilash, xususan, eskirib, yaroqsiz holga kelgan yog‘och elektr ustunlarini almashtirish hamda ichki yo‘llarni asfaltlash masalalari ko‘tarildi.

Mazkur murojaatlar yuzasidan deputat tomonidan elektr ta’minoti bilan bog‘liq muammoni bartaraf etish maqsadida tegishli mutasaddi tashkilotlarga deputatlik so‘rovi yuborilgani ma’lum qilindi. Shuningdek, ichki yo‘llarni asfaltlash masalasi "Tashabbusli budjet" loyihasi doirasida amalga oshirish uchun ovoz berish bosqichiga qo‘yilgani ta’kidlandi.

Shu bilan birga, fuqarolarga mahallani yanada obodonlashtirish, tashabbusli budjet loyihalarida faol ishtirok etish, hudud ravnaqi yo‘lida birlashib harakat qilish hamda jamoatchilik tashabbuslarini qo‘llab-quvvatlash muhimligi tushuntirildi.

Uchrashuv yakunida Termiz tuman Kengashi kotibiyati mutaxassisi K.Abdullayeva tomonidan deputatning 2026-yil birinchi yarim yillikdagi faoliyati yuzasidan axborot berildi. Xususan, saylov okrugida amalga oshirilgan ishlar, fuqarolar murojaatlarini hal etish borasida erishilgan natijalar hamda kelgusida amalga oshirilishi rejalashtirilgan ustuvor vazifalar batafsil yoritildi.