Xalq deputatlari Chilonzor tumani Kengashining Mahalliy budjet, iqtisodiy islohotlarni amalga oshirish, investitsiyalar va tadbirkorlikni rivojlantirish masalalari bo‘yicha doimiy komissiyasi yig‘ilishida tumanda “Erta aralashuv” xizmatini tashkil etish hamda mazkur yo‘nalishni qo‘shimcha moliyalashtirish masalasi muhokama qilindi.

Yig‘ilish davomida 0–3 yoshdagi nogironligi bo‘lgan yoki rivojlanishida nuqsonlari mavjud bolalarga kompleks ijtimoiy xizmatlar ko‘rsatish uchun zarur shart-sharoitlarni yaratish, xizmat faoliyatini yo‘lga qo‘yish va uni moddiy-texnik jihatdan ta’minlash masalalariga alohida e’tibor qaratildi.

Doimiy komissiya tomonidan masala atroflicha ko‘rib chiqilib, “Erta aralashuv” xizmatini tashkil etish loyihasini ma’qullash hamda qo‘shimcha mablag‘ ajratish to‘g‘risidagi taklifni Xalq deputatlari Chilonzor tumani Kengashi sessiyasi muhokamasiga kiritish uchun tavsiya etish yuzasidan tegishli qaror qabul qilindi.

Mazkur tashabbusning amalga oshirilishi bolalar va ularning oilalariga ko‘rsatiladigan ijtimoiy xizmatlar qamrovini kengaytirish, ehtiyojmand oilalarni qo‘llab-quvvatlash hamda tumanda ijtimoiy himoya tizimi samaradorligini oshirishga xizmat qiladi.