Xalq deputatlari Qo‘qon shahar Kengashiga 26-“Yangi obod” saylov okrugidan saylangan deputat G.Paygamova tomonidan “Yangi obod” mahalla fuqarolar yig‘inida navbatdagi o‘rganish ishlari olib borildi.

O‘rganish davomida Xalq deputatlari Qo‘qon shahar Kengashining 2026-yil 25-maydagi VII-22-42-11-166-K/26-sonli qarori asosida uy-joy ta’miri uchun mablag‘ ajratilgan fuqarolar xonadonlarida amalga oshirilgan ishlarning holati ko‘zdan kechirildi.

Jumladan, “Yangi obod” MFY, A.T.Xuqandiy mavzesi, 110-uy, 40-xonadonda yashovchi II guruh nogironi fuqaro D.Komilova xonadoniga tashrif buyurilib, mazkur qaror doirasida amalga oshirilgan “yashil ta’mirlash” ishlari bilan yaqindan tanishildi.

O‘rganish davomida fuqaroning xonadonida uy-joy ta’miri uchun tegishli mablag‘ ajratilgani va qurilish-ta’mirlash ishlari amalga oshirilgani, biroq ta’mirlash ishlari to‘liq yakuniga yetkazilmagani ma’lum bo‘ldi.

Shuningdek, bajarilgan ta’mirlash ishlarining sifati, foydalanilgan qurilish materiallarining holati, ishlarning belgilangan talab va muddatlarga muvofiqligi hamda fuqaro uchun yaratilgan shart-sharoitlar atroflicha ko‘zdan kechirildi.

O‘rganish yakunida fuqaroning uy-joyini ta’mirlash ishlarini to‘liq yakuniga yetkazish masalasini amaldagi qonunchilik doirasida hal etish, mas’ul tashkilotlar bilan hamkorlikda zarur amaliy choralarni ko‘rish hamda ishlarning yakunlanishini nazoratga olish bo‘yicha tegishli vazifalar belgilandi.

Xalq deputatlari Qo‘qon shahar Kengashi