Xalq deputatlari Termiz shahar Kengashining navbatdagi sessiyasiga tayyorgarlik ko‘rish doirasida Kengash doimiy komissiyalarining qo‘shma yig‘ilishi bo‘lib o‘tdi.

Yig‘ilishda Kengash raisi, doimiy komissiyalar raislari, ekspert guruhi a'zolari, deputatlar, Kengash kotibiyati mas’ullari hamda tegishli soha rahbarlari ishtirok etdilar.

Yig‘ilishda Termiz shahrida 2026–2027-yillar kuz-qish mavsumiga tayyorgarlik ko‘rish, ijtimoiy soha obyektlari (maktab, bog‘cha, shifoxonalar va b.) hamda ko‘p qavatli uy-joy fondini mavsumga tayyorlash yuzasidan amalga oshirilayotgan ishlar bo‘yicha Termiz shahar hokimining o‘rinbosari B.Ergashovning hisoboti tinglandi va atroflicha muhokama qilindi.

Soha rahbarining axborotida kuz-qish mavsumiga tayyorgarlik bo‘yicha quyidagi muhim yo‘nalishlar qamrab olindi:

• 🏫 Ijtimoiy soha obyektlari shayligi: Shahardagi barcha ta’lim, tibbiyot va madaniyat muassasalarining isitish tizimlari, lokall-qozonxonalari hamda issiqlik tarmoqlarining mavsumiy sozligi;

• 🏢 Ko‘p qavatli uy-joy fondi: Boshqaruv servis kompaniyalari (BSK) va mas’ul tashkilotlar tomonidan ko‘p qavatli uylarning tom qismi, yerto‘la kommunikatsiyalari hamda kireverish yo‘laklarini ta’mirlash ko‘rsatkichlari;

• ⚡️🔥 Muhandislik va kommunal infratuzilma: Elektr, tabiiy va suyultirilgan gaz, ichimlik suvi hamda issiqlik ta’minoti korxonalarining uzluksiz ishlashini muvofiqlashtirish hamda favqulodda avariya holatlari uchun zaruriy moddiy-texnik zaxiralarni yaratish.

🗣️ Deputatlarning tanqidiy savol-javoblari va qat’iy talabi:

Komissiya a’zolari hisobotni tinglash barobarida, o‘z saylov okruglaridagi haqiqiy ahvolga tayangan holda qizg‘in va tanqidiy muhokama o‘tkazdilar.

Xususan, deputatlar tomonidan sovuq kunlar kelmasidan oldin ayrim ko‘p qavatli uylarning yerto‘la va muhandislik tarmoqlaridagi kamchiliklarni to‘liq bartaraf etish, BSKlar mas’uliyatini oshirish, chekka mahallalardagi ta’lim va tibbiyot obyektlarida issiqlik manbalarini barqarorlashtirish bo‘yicha shahar hokimi o‘rinbosariga qat’iy talab hamda tavsiyalar berildi.

Doimiy komissiyalarning qo‘shma yig‘ilishi yakunida bildirilgan mulohaza va takliflar inobatga olinib, mazkur hisobot hamda tegishli qaror loyihasi Xalq deputatlari Termiz shahar Kengashining navbatdagi sessiyasi kun tartibiga kiritilishi belgilab olindi.