O‘zbekiston Respublikasi Prezidentining 2024-yil 2-fevraldagi PQ–406-son qarori, O‘zbekiston Respublikasi Oliy Majlisi Senati Kengashining KQ–35–V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya ijrosini ta’minlash maqsadida hududlarda deputatlik nazorati tadbirlari izchil davom ettirilmoqda.

Shu doirada Xalq deputatlari Marg‘ilon shahar Kengashining 6-Xo‘japorso saylov okrugi deputati G‘.Madumarov tomonidan Xo‘japorso va Zuhro mahallalarida o‘rganishlar olib borildi.

O‘rganishlar davomida, avvalo, Xo‘japorso mahallasida hokim yordamchilari tomonidan amalga oshirilayotgan ishlarning samaradorligi, xususan, aholini kambag‘allikdan chiqarish, fuqarolarning daromad manbalarini kengaytirish va bandligini ta’minlash borasidagi ishlar holatiga e’tibor qaratildi.

Mazkur yo‘nalishda amalga oshirilayotgan ishlar tahlil qilinib, aholining ijtimoiy-iqtisodiy muammolarini aniqlash va ularni manzilli hal etish, mavjud imkoniyatlardan samarali foydalanish masalalari yuzasidan tegishli tavsiyalar berildi.

Zuhro mahallasida esa shahar hokimi E. Rustamov hamda deputat M. Mirzayev hamrohligida mahalla ichki ko‘cha yo‘llarining holati, hududni obodonlashtirish hamda ko‘chalarni tungi vaqtda yoritish masalalari o‘rganildi.

Aholi uchun qulay va xavfsiz shart-sharoit yaratishda ichki yo‘llarning sozligi hamda ko‘chalarning yetarli darajada yoritilishi muhim ahamiyat kasb etadi. Shu bois o‘rganish davomida aniqlangan masalalarni tegishli tashkilotlar bilan hamkorlikda bosqichma-bosqich hal etish bo‘yicha vazifalar belgilandi.

Deputat tomonidan mahallalarda olib borilayotgan bunday o‘rganishlar saylovchilar murojaatlari va hududdagi mavjud muammolarni joyiga chiqqan holda aniqlash, ularning yechimiga erishish hamda ijrosi ustidan deputatlik nazoratini kuchaytirishga xizmat qilmoqda.

Xalq deputatlari Marg‘ilon shahar Kengashi deputatlari tomonidan hududlarda aholi bilan bevosita muloqot qilish, muammolarni o‘rganish va ularning amaliy yechimini ta’minlashga qaratilgan deputatlik nazorati tadbirlari izchil davom ettiriladi.