Xalq deputatlari Nurobod tumani Kengashi deputati G.Xusanova tomonidan 2-Konchi saylov okrugida joylashgan tuman Sog‘liqni saqlash bo‘limida o‘rganish ishlari olib borildi.

O‘rganish davomida tuman Sog‘liqni saqlash bo‘limi binosida mavjud bo‘lgan 2 (ikki) dona lift qurilmasi uzoq yillar davomida foydalanilmagani oqibatida jismonan va ma’nan eskirgani hamda texnik jihatdan yaroqsiz holatga kelib qolgani aniqlandi.

Mazkur holat, ayniqsa, og‘ir ahvoldagi va shoshilinch tibbiy yordamga muhtoj bemorlarni binoning yuqori qavatlariga tezkor hamda xavfsiz olib chiqishda jiddiy qiyinchiliklarni yuzaga keltirmoqda. Natijada tibbiy xizmat ko‘rsatish jarayonining samaradorligiga salbiy ta’sir ko‘rsatib, bemorlar va ularning yaqinlari uchun noqulayliklar tug‘dirmoqda.

Deputat tomonidan aniqlangan muammoni bartaraf etish maqsadida mas’ul tashkilotlar vakillariga lift qurilmalarini belgilangan tartibda ta’mirlash yoki zamonaviy lift uskunalari bilan almashtirish yuzasidan tegishli taklif va tavsiyalar bildirildi.

Xalq deputatlari Nurobod tumani Kengashi deputatlari tomonidan saylov okruglarida fuqarolarni qiynayotgan muammolarni joyiga chiqib o‘rganish, ularni hal etish yuzasidan amaliy choralar ko‘rish hamda mas’ul tashkilotlar bilan hamkorlikni kuchaytirish ishlari izchil davom ettirilmoqda.