#deputat_soʻrovi #poytaxtdeputatlari #deputatlik_faoliyati

❗️Deputatlik so‘rovi orqali Shayxontohur tumanidagi sug‘orish tizimi muammosi ko‘tarildi

🏛 Xalq deputatlari Toshkent shahar Kengashi deputati Umidjon Sanakulov tomonidan fuqarolar murojaatlari asosida Shayxontohur tumani hokimi A.Y. Abubakirov nomiga deputatlik so‘rovi yuborildi.

🌿 Deputatlik so‘rovi Shayxontohur tumani “Ibn Sino” mahalla fuqarolar yig‘inida o‘tkazilgan uchrashuvlar davomida aholi tomonidan bildirilgan murojaatlar asosida tayyorlandi. Uchrashuvlarda mahalla hududidagi ko‘p qavatli uylar oldida joylashgan sug‘orish tizimlari uzoq yillardan buyon ishlamayotgani, buning oqibatida yashil hududlarni parvarishlashda jiddiy muammolar yuzaga kelayotgani qayd etildi.

💧 O‘rganishlar davomida “Yashil makon” loyihasi doirasida o‘rnatilgan sug‘orish quvurlari bugungi kunda nosoz holga kelgani va ulardan foydalanishning imkoni yo‘qligi aniqlandi. Natijada mahalla aholisi daraxtlar, ko‘chatlar hamda ekin maydonlarini sug‘orishda katta qiyinchiliklarga duch kelayotgani, suv tanqisligi sababli ayrim o‘simliklarning qurib qolish holatlari kuzatilayotgani ma’lum bo‘ldi.

📝 Mahalla fuqarolar yig‘ini raisining ma’lum qilishicha, ushbu muammo yuzasidan tegishli tashkilotlarga bir necha bor murojaat qilingan bo‘lsa-da, hozirga qadar amaliy choralar ko‘rilmagan.

🔎 Shu munosabat bilan deputat Umidjon Sanakulov tomonidan Shayxontohur tumani hokimi A.Y. Abubakirovdan “Ibn Sino” mahallasidagi buzilgan va eskirgan sug‘orish tizimlarini ta’mirlash hamda qayta tiklash, sug‘orish infratuzilmasini to‘liq inventarizatsiyadan o‘tkazish, uni modernizatsiya qilish bo‘yicha aniq muddatli reja ishlab chiqish hamda amalga oshiriladigan ishlar yuzasidan qonunchilikda belgilangan muddatda yozma ma’lumot taqdim etish so‘ralgan.

🤝 Mazkur deputatlik so‘rovi “Xalq deputatlari viloyat, tuman va shahar Kengashi deputatining maqomi to‘g‘risida”gi Qonunning 5 va 8-moddalari asosida yuborilgan bo‘lib, ko‘tarilgan masala deputat Umidjon Sanakulov tomonidan nazoratga olingan.

📱 Telegram 📱 Instagram 📱 Facebook 📱 YouTube 🔎 E-kengash