Mahalliy Kengash deputatlari tomonidan joylarda olib borilayotgan o‘rganishlar aholini qiynayotgan muammolarni aniqlash, ularga amaliy yechim topish, ijtimoiy sohalarda amalga oshirilayotgan ishlar samaradorligini oshirish hamda davlat dasturlari ijrosini ta’minlashda muhim ahamiyat kasb etmoqda.

Shu maqsadda Xalq deputatlari Muzrabot tumani Kengashining 21-«Guliston» saylov okrugidan saylangan deputat, tuman hokimi Abdulla Mamatqulov «Xalq yo‘li» mahallasida bo‘lib, hududda amalga oshirilayotgan bunyodkorlik ishlari hamda aholi uchun yaratilayotgan sharoitlar bilan tanishdi.

Tashrif doirasida mahallada 90 nafar bolani qamrab olish imkoniyatiga ega bo‘lgan zamonaviy davlat maktabgacha ta’lim tashkilotining tantanali ochilish marosimi bo‘lib o‘tdi.

Tadbirda tuman hokimi, tuman Kengashi deputatlari, mahalla nuroniylari, soha mutasaddilari, keng jamoatchilik va mahalla fuqarolari ishtirok etdilar.

Marosimda so‘zga chiqqan Abdulla Mamatqulov mamlakatimizda, xususan Muzrabot tumanida O‘zbekiston Respublikasi Prezidenti tashabbuslari asosida ta’lim tizimini rivojlantirish, qurilish va obodonlashtirish sohalarida keng ko‘lamli islohotlar amalga oshirilayotganini ta’kidladi. Yangi davlat bog‘chasi bolajonlarni sifatli ta’lim-tarbiya bilan qamrab olish, ularning bilim va iste’dodini rivojlantirish hamda kelajakda yurt taraqqiyotiga munosib hissa qo‘shadigan barkamol avlodni voyaga yetkazishga xizmat qilishi qayd etildi.

Shundan so‘ng ramziy tasma qirqilib, ishtirokchilar yangi ta’lim muassasasida yaratilgan shart-sharoitlar bilan tanishdilar. Yorug‘ va shinam guruh xonalari, qulay yotoqxonalar, oshxona, musiqa va mashg‘ulot xonalari hamda bolalarning har tomonlama rivojlanishi uchun yaratilgan imkoniyatlar mehmonlarda katta taassurot qoldirdi.

Tuman hokimi tomonidan tarbiyalanuvchilarga esdalik sovg‘alari topshirildi. Tadbir davomida mahalla ahli uchun dasturxon yozilib, osh tortildi.
Ayniqsa, mahalla nuroniylari ushbu muassasa «Xalq yo‘li» mahallasidagi ilk davlat maktabgacha ta’lim tashkiloti ekanini mamnuniyat bilan ta’kidlab, yurtimizda amalga oshirilayotgan xalqparvar va bunyodkor siyosat uchun minnatdorlik bildirdilar hamda ezgu tilaklarini izhor etdilar.

Mazkur zamonaviy ta’lim muassasasi «Modern Master Stroy» MChJ tomonidan sifatli qurib bitkazildi.

Bu kabi ezgu ishlar xalq deputatlari mahalliy Kengashi deputatlari tomonidan olib borilayotgan deputatlik nazorati va aholi manfaatlarini ta’minlashga qaratilgan amaliy faoliyatning yana bir yorqin ifodasi hisoblanadi.