Xalq deputatlari Chilonzor tuman Kengashi deputati Imamov Sanjarali Tolkinovich tomonidan “Beshqo‘rg‘on” MFY hududidagi ayrim ichki ko‘chalarning holatini yaxshilash hamda ularga asfalt qoplamasi yotqizish masalasi yuzasidan tegishli tashkilotga deputat so‘rovi yuborildi.

Mazkur deputat so‘roviga “Beshqo‘rg‘on” mahallasi fuqarolaridan kelib tushgan murojaatlar asos bo‘ldi. Murojaatlarda mahalla hududida jami 27 ta ko‘cha mavjudligi, ularning asosiy qismi ta’mirlangan bo‘lsa-da, 1-tor Karvonsaroy, 4-tor Karvonsaroy, 4-tor Beshqo‘rg‘on hamda 2-berk Beshqo‘rg‘on ko‘chalari ta’mirlanmay qolganligi qayd etilgan.

Hozirgi kunda mazkur ko‘chalardagi yo‘l qoplamasining talab darajasiga javob bermasligi fuqarolar va transport vositalarining harakatlanishida noqulayliklarni yuzaga keltirmoqda. Shuningdek, ushbu masala bo‘yicha mahalla aholisidan og‘zaki va yozma murojaatlarning muntazam kelib tushayotgani muammoni o‘rganish va tegishli choralar ko‘rish zarurligini ko‘rsatmoqda.


Deputat so‘rovida “Beshqo‘rg‘on” MFY hududidagi 1-tor Karvonsaroy, 4-tor Karvonsaroy, 4-tor Beshqo‘rg‘on hamda 2-berk Beshqo‘rg‘on ko‘chalarining mavjud holatini joyiga chiqqan holda o‘rganish hamda ularga asfalt qoplamasi yotqizish bo‘yicha zarur amaliy choralarni ko‘rish so‘ralgan.


Mazkur masalaning ijobiy hal etilishi mahalla yo‘l infratuzilmasini yaxshilash, aholining turmush sifatini oshirish hamda fuqarolar uchun xavfsiz va qulay harakatlanish sharoitlarini yaratishga xizmat qiladi.