Yo‘lni kengaytirish masalasi yuzasidan fuqarolar bilan uchrashuv o‘tkazildi

Xalq deputatlari Navoiy shahar Kengashi kotibiyati mudiri Hafizov Jo‘rabek O‘ktam o‘g‘li tomonidan 21-Turon saylov okrugi hududidagi "Yoshlik" mahallasi fuqarolari bilan uchrashuv o‘tkazildi. Uchrashuvda Navoiy shahar hokimi Dilmurod Ergashev ham ishtirok etdi.

Uchrashuv davomida hududda amalga oshirilishi rejalashtirilayotgan yo‘lni kengaytirish loyihasi yuzasidan fuqarolarga batafsil ma’lumot berildi. Xususan, loyiha doirasida ayrim turar joylar va yordamchi inshootlar buzilish hududiga tushayotgani, barcha ishlar amaldagi qonunchilik talablariga muvofiq amalga oshirilishi hamda fuqarolarning qonuniy huquq va manfaatlari ta’minlanishi alohida ta’kidlandi.

Shuningdek, uchrashuv davomida fuqarolarning taklif va murojaatlari tinglanib, ularni qiziqtirgan savollarga mutasaddilar tomonidan batafsil javob va huquqiy tushuntirishlar berildi. Xususan, kompensatsiya to‘lovlari, mulkni baholash, ko‘chirish bilan bog‘liq tartib-taomillar hamda loyihani amalga oshirish bosqichlari yuzasidan zarur ma’lumotlar yetkazildi.

Uchrashuv yakunida yo‘lni kengaytirish loyihasini amalga oshirish jarayonida ochiqlik va shaffoflikni ta’minlash, fuqarolar bilan doimiy muloqotni davom ettirish hamda yuzaga keladigan masalalarni qonunchilik asosida hal etish yuzasidan tegishli tavsiyalar va topshiriqlar berildi.