Xalq deputatlari Sirdaryo viloyati Kengashi bosh mutaxassisi Sh.Tursunqulov, Sardoba tumani Kengashi raisi R.Tashpulatov, kotibiyat mudiri Q.O‘tayev hamda tuman deputati G.Suvonqulovalar tomonidan Birlashgan mahallasida joylashgan Madaniyat markazi faoliyati va unda yaratilgan shart-sharoitlar o‘rganildi.
O‘rganish jarayonida muassasaning moddiy-texnik bazasi, binodan foydalanish holati, xavfsizlik talablariga rioya etilishi hamda aholiga madaniy xizmatlar ko‘rsatish sifati tahlil qilindi.
Tahlillar natijasida Madaniyat markazida yong‘in xavfsizligi talablariga to‘liq rioya etilmayotganligi, xususan, yong‘in xavfsizligi qutilari va ularning jihozlanish holati belgilangan talab darajasiga javob bermasligi aniqlandi. Bu esa favqulodda holatlar yuzaga kelgan taqdirda tezkor chora ko‘rish imkoniyatlarini cheklashi va fuqarolar xavfsizligiga salbiy ta’sir ko‘rsatishi mumkinligi ta’kidlandi.
Mazkur holat yuzasidan mas’ullarga tanqidiy ogohlantirishlar berildi hamda yong‘in xavfsizligi vositalarini belgilangan me’yorlar asosida qayta jihozlash, kamchiliklarni qisqa muddatlarda bartaraf etish va bu boradagi nazoratni kuchaytirish bo‘yicha aniq vazifalar belgilab berildi.
O‘rganish yakunida muassasada xavfsizlik talablariga so‘zsiz rioya etilishini ta’minlash, mavjud kamchiliklarni bartaraf etish hamda kelgusida bunday holatlarga yo‘l qo‘ymaslik yuzasidan tegishli chora-tadbirlar amalga oshirilishi belgilandi.