Xalq deputatlari Parkent tuman Kengashiga 5-“Changi” saylov okrugidan saylangan deputat Mahkamova Feruza Sa’diyevna tomonidan navbatdagi sessiya kun tartibiga kiritilishi rejalashtirilayotgan masala yuzasidan deputatlik nazorati amalga oshirildi.Nazorat tadbiri doirasida Parkent tumanidagi 1-son ixtisoslashtirilgan davlat umumta’lim maktabida yoshlarning yozgi ta’til davrini mazmunli tashkil etishga qaratilgan “Dolzarb 90 kun” dasturining ijrosi o‘rganildi. Jumladan, maktab qoshida faoliyat yuritayotgan yozgi sog‘lomlashtirish oromgohida o‘quvchilar uchun yaratilgan sharoitlar, ularning bo‘sh vaqtini samarali tashkil etishga xizmat qilayotgan fan, sport va qiziqishlar bo‘yicha to‘garaklar faoliyati joyiga chiqib ko‘zdan kechirildi.Shuningdek, ta’lim muassasasida olib borilayotgan obodonlashtirish ishlari, texnika xavfsizligi qoidalariga rioya etilishi,
sanitariya-gigiyena holati, xususan, hojatxonalar va sport maydonlarining holati ham atroflicha o‘rganildi. O‘rganish davomida aniqlangan ayrim kamchiliklar yuzasidan mas’ul tashkilot va mutasaddilarga tegishli tavsiyalar berildi.Deputat tomonidan mazkur yo‘nalishdagi holatlar navbatdagi doimiy komissiya yig‘ilishida muhokama qilinishi hamda mas’ul rahbarlarga deputatlik nazorati tartibida tegishli savollar kiritilishi
belgilandi.Mazkur o‘rganish natijalari navbatdagi sessiyada ko‘rib chiqiladigan masalalarni puxta tayyorlash, yoshlarning yozgi ta’tilini mazmunli tashkil etish hamda ta’lim muassasalarida yaratilgan sharoitlarni yanada takomillashtirishga xizmat qiladi.