Xalq deputatlari Jondor tumani Kengashi deputati I.Xolov hamda tuman Kengashi kotibiyati bosh mutaxassislari J.Norov va R.Murodovlar hamkorligida “Bahoriston” mahalla fuqarolar yig‘ini hududida joylashgan Urganjiyon oilaviy shifokorlik punktida aholiga o‘z vaqtida va sifatli tibbiy yordam ko‘rsatilishi holati o‘rganildi.
➡️O‘rganish jarayonida tibbiyot muassasasida aholi murojaatlarini qabul qilish tartibi, bemorlarga tibbiy xizmat ko‘rsatish sifati, dori-darmon ta’minoti, tibbiy jihozlardan foydalanish holati hamda tibbiyot xodimlari uchun yaratilgan shart-sharoitlar ko‘zdan kechirildi.
➡️Shuningdek, tibbiyot muassasasiga tashrif buyurgan fuqarolar bilan muloqot qilinib, ularning tibbiy xizmatdan foydalanish bo‘yicha fikr va takliflari tinglandi. Suhbatlar davomida aholiga tibbiy xizmatlarni yanada yaxshilash, profilaktik ko‘riklarni muntazam tashkil etish hamda salomatlikni mustahkamlashga qaratilgan tadbirlarni kuchaytirish muhimligi ta’kidlandi.
➡️O‘rganish yakunida aniqlangan ayrim masalalar yuzasidan mutasaddi tashkilotlar bilan hamkorlikda tegishli choralar ko‘rish bo‘yicha tavsiyalar berildi. Aholi salomatligini muhofaza qilish, ularga sifatli va samarali tibbiy xizmat ko‘rsatilishini ta’minlash deputatlik nazoratining ustuvor yo‘nalishlaridan biri bo‘lib qolmoqda.