Xalq deputatlari Termiz shahar Kengashi raisi D.Normuradova o‘z saylov okrugiga qarashli “Abdulla Avloniy” mahallasida bo‘lib, mahalla faollarining bugungi kundagi ish faoliyati bilan yaqindan tanishdi.

Mazkur nazorat-tahlil jarayoni mahalliy Kengash deputatlari faoliyati uchun belgilangan “24 ta eng muhim yo‘nalish” mezonlari doirasida tashkil etildi.

Tashrif davomida Kengash raisi mahalla faollari bilan samimiy suhbat o‘tkazib, ularning ish tizimini atroflicha tahlil qildi:


Tahlil markazida bo‘lgan muhim yo‘nalishlar:

• Mahalla raisi bilan: Mahalladagi umumiy ijtimoiy-ma’naviy muhit, aholi murojaatlari bilan ishlash tizimi hamda "mahalla yettiligi" faoliyatini samarali muvofiqlashtirish masalalari;

• Hokim yordamchisi bilan: Mahallada aholi bandligini ta’minlash, oilaviy tadbirkorlikni rivojlantirish dasturlari doirasida imtiyozli kreditlar ajratilishi hamda kambag‘allikni qisqartirish borasidagi ishlar samaradorligi;

• Xotin-qizlar faoli bilan: Mahalladagi xotin-qizlarning huquq va manfaatlarini himoya qilish, "Ayollar daftari" orqali ko‘rsatilayotgan manzilli ko‘maklar hamda oilaviy munosabatlarni sog‘lomlashtirish choralari;

• Ijtimoiy xodim bilan: Mahalladagi ehtiyojmand va ko‘makka muhtoj oilalar, keksalar, yolg‘iz kishilar hamda nogironligi bo‘lgan shaxslarga ko‘rsatilayotgan ijtimoiy xizmatlarning sifati va manzilliligi.

💬"Mahalla faollari — aholining dardu tashvishini birinchi bo‘lib eshitadigan va ularga ko‘mak beradigan eng muhim bo‘g‘indir. Shunday ekan, har bir faol o‘ziga yuklatilgan mas’uliyatni chuqur his qilishi va xalq roziligi uchun tinimsiz mehnat qilishi lozim," — deya ta'kidladi Kengash raisi D.Normuradova.