Yoshlarga imtiyozli kreditlar ajratiladi

Davlatimiz rahbari tomonidan yigit-qizlarning bandligini ta’minlash va ularning biznes tashabbuslarini har tomonlama qo‘llab-quvvatlashga qaratilgan yana bir muhim hujjat — “Tadbirkorlik loyihalarini qo‘llab-quvvatlash orqali yoshlar bandligini ta’minlashga doir qo‘shimcha chora-tadbirlar to‘g‘risida”gi (PQ–210-son, 01.06.2026-y.) qaror imzolandi.

Mazkur hujjatga ko‘ra, AT “Aloqabank” tomonidan “Yoshlar biznesi” dasturi doirasida 31 yoshga to‘lmagan yoshlarga 7 yilgacha muddatga imtiyozli kreditlar ajratiladi.

Kredit shartlari.

Imtiyozli davr: asosiy qarzdan 1 yilgacha, foiz to‘lovlaridan 3 oygacha;

Stavka. Markaziy bank asosiy stavkasidan 4 foizlik punkt yuqori stavkada.

Sug‘urta polisi yoki uchinchi shaxs kafilligi asosida 100 mln so‘mgacha bo‘lgan imtiyozli mikroqarzlar quyidagi maqsadlar uchun beriladi:

1. 20 mln so‘mgacha — xorijiy til va raqamli texnologiyalarni o‘rganish hamda zamonaviy kasb-hunar egallash bo‘yicha o‘qish xarajatlari uchun;

2. 50 mln so‘mgacha — zamonaviy kasblar (SMM, mobilografiya, frilanserlik), internet do‘konlar tashkil etish va o‘zini o‘zi band qilish loyihalari uchun;

3. 50 mln so‘mgacha — kasanachilik, to‘qimachilik, mahsulotlarni ikkilamchi qayta ishlash va sotish loyihalari uchun;

4. 100 mln so‘mgacha — novvoychilik va shirinliklar tayyorlash hamda sotish loyihalari uchun.

Ushbu imkoniyat yoshlarning tadbirkorlik tashabbuslarini qo‘llab-quvvatlash va ularning bandligini ta’minlashda muhim qadam bo‘lib xizmat qiladi.