#deputat_soʻrovi #poytaxtdeputatlari #deputatlik_faoliyati

❗️ Deputatlik so‘rovlari orqali “Bog‘i eram” mahallasidagi dolzarb masalalar ko‘tarildi

🏛 Xalq deputatlari Toshkent shahar Kengashi deputati Fotima Mannopova tomonidan Yunusobod tumanidagi “Bog‘i eram” mahallasi aholisi bilan o‘tkazilgan uchrashuvlarda bildirilgan murojaatlar asosida Toshkent shahar Ekologiya, atrof-muhitni muhofaza qilish va iqlim o‘zgarishi boshqarmasi hamda Yunusobod tumani hokimligiga deputatlik so‘rovlari yuborildi.

📝 Joriy yilning 5-iyun kuni mahalla aholisi va mahalla yettiligi bilan o‘tkazilgan uchrashuv davomida hududdagi ekologik holat, obodonlashtirish, jamoat xavfsizligi hamda bolalar uchun yaratilgan infratuzilma bilan bog‘liq qator masalalar ko‘tarildi.

🌳 Xususan, fuqarolar tomonidan mahalla hududidagi ayrim daraxtlarning shoxlari haddan tashqari o‘sib ketgani, qurigan va xavf tug‘diruvchi shoxlar mavjudligi sababli aholi xavfsizligi, elektr tarmoqlari hamda hududning obodonlashtirish holatiga salbiy ta’sir ko‘rsatayotgani ta’kidlandi. Shu munosabat bilan deputat Fotima Mannopova Toshkent shahar Ekologiya, atrof-muhitni muhofaza qilish va iqlim o‘zgarishi boshqarmasi boshlig‘i A.Rasulov nomiga deputatlik so‘rovi yuborib, “Bog‘i eram” mahallasidagi daraxtlarni mutaxassislar ishtirokida o‘rganish hamda amaldagi ekologik talablar asosida zarur hollarda sanitariya butash va parvarishlash ishlarini tashkil etish masalasini ko‘rib chiqishni so‘radi.

💡 Shuningdek, aholi tomonidan hududdagi yoritish tizimi, videokuzatuv vositalari va bolalar maydonchalarining holati yuzasidan ham taklif va murojaatlar bildirildi. Shu asosda Yunusobod tumani hokimi A.Saidaliyev nomiga yuborilgan deputatlik so‘rovida mahalla hududidagi 57-sonli ko‘p qavatli uy atrofiga 3 ta tashqi yoritish moslamasi, 56-sonli uy yonidagi mahalla guzari ortida joylashgan bolalar maydonchasiga esa 2 ta tashqi yoritish moslamasi o‘rnatish masalasi ko‘tarildi.

📹 Bundan tashqari, fuqarolar xavfsizligini ta’minlash, huquqbuzarliklarning oldini olish va jamoat tartibini mustahkamlash maqsadida mahalla hududiga 30 ta videokuzatuv kamerasini o‘rnatish hamda mavjud bolalar maydonchasini qayta ta’mirlash, o‘yin uskunalarini yangilash va maydonchani zamonaviy talablarga mos holatga keltirish bo‘yicha amaliy choralar ko‘rish taklif etildi.

🔎 Deputatlik so‘rovlarida mas’ul tashkilotlardan ko‘tarilgan masalalarni atroflicha o‘rganish, zarur chora-tadbirlarni belgilash hamda ko‘rilgan choralar yuzasidan qonunchilikda belgilangan 10 kun muddatda yozma ma’lumot taqdim etish so‘ralgan.

🤝 Mazkur masalalar deputat tomonidan nazoratga olingan.

📱 Telegram 📱 Instagram 📱 Facebook 📱 YouTube 🔎 E-kengash