Joriy yilning 16-iyun kuni Xalq deputatlari Surxondaryo viloyati Kengashining Agrar, suv xo‘jaligi va ekologiya masalalari bo‘yicha doimiy komissiyasi yig‘ilishi bo'lib o'tdi. “O‘zbekiston qishloq xo‘jaligida zamonaviy suv tejovchi texnologiyalarni joriy etish” loyihasining ikkinchi bosqichini amalga oshirish yuzasidan ishlab chiqilgan loyiha konsepsiyasi muhokama qilindi.

Yig‘ilish davomida “O‘zbekiston Respublikasi qishloq xo‘jaligini modernizatsiya qilish” loyihasining hududiy muvofiqlashtiruvchisi Turayev Ulug‘bek Xudoyberdiyevich mazkur loyiha doirasida amalga oshirilishi rejalashtirilgan ishlar, suv tejovchi texnologiyalarni joriy etishning ahamiyati hamda kutilayotgan natijalar yuzasidan hisobot berdi.

Muhokamalar jarayonida deputatlar tomonidan loyiha konsepsiyasi yuzasidan fikr-mulohaza va takliflar bildirildi. Komissiya a’zolari loyiha qishloq xo‘jaligida suv resurslaridan samarali foydalanish, hosildorlikni oshirish hamda zamonaviy agrotexnologiyalarni keng joriy etishda muhim ahamiyat kasb etishini ta’kidladilar.

Yig‘ilishni xalq deputatlari viloyat Kengashining Agrar, suv xo‘jaligi va ekologiya masalalari bo‘yicha doimiy komissiyasi raisi Dilfuza Djo‘rayeva olib bordi.

Ko‘rib chiqilgan masala yuzasidan tegishli qaror qabul qilinib, uni xalq deputatlari Surxondaryo viloyati Kengashining navbatdagi sessiyasi kun tartibiga kiritish tavsiya etildi.