ЁШЛАР БИЛАН ИШЛАШ БЎЙИЧА ҲИСОБОТ ЭШИТИЛДИ
Халқ депутатлари Янгиқўрғон тумани Кенгашида доимий комиссиялар йиғилиши давом этмоқда.
Йиғилишда Янгиқўрғон тумани Ёшлар ишлари бўлими томонидан 2026 йилнинг 5 ойи давомида амалга оширилган ишлар юзасидан ҳисобот эшитилди.
Ҳисоботда таъкидланишича, тумандаги 68 та маҳалла фуқаролар йиғинида ёшлар етакчилари фаолият юритиб, ёшлар бандлигини таъминлаш, уларни тадбиркорликка жалб этиш, маънавиятини юксалтириш, спорт ва маданий тадбирларга кенг қамраб олиш борасида тизимли ишлар амалга оширилмоқда.
Жумладан, муддатли ҳарбий хизматдан қайтган 210 нафар ёш раҳбарларга бириктирилган бўлиб, уларнинг 153 нафари билан учрашувлар ўтказилди, 60 нафарининг бандлиги таъминланди.
Шунингдек, ёшлар тадбиркорлигини қўллаб-қувватлаш мақсадида 31 нафар ёшга 548 млн сўм, 4 нафар ёшга 340 млн сўм кредит маблағлари ажратилган.
“Ёшлар дафтари” электрон платформаси орқали 26 нафар ёш рўйхатга олиниб, 9 нафарига жамғарма ҳисобидан амалий ёрдам кўрсатилган. Бу мақсадлар учун 34,1 млн сўм маблағ сарфланган.
“Беш ташаббус олимпиадаси” доирасида 58 195 нафар ёш электрон рўйхатдан ўтган. Ўтган даврда 68 та маҳаллада 516 та танлов ва спорт мусобақалари ўтказилиб, 30 мингдан ортиқ ёшлар қамраб олинган.
Йиғилишда ёшларни китобхонликка жалб этиш, хорижий тиллар, замонавий касблар, ахборот технологиялари ва шахмат спорт турини оммалаштириш борасидаги ишлар ҳам муҳокама қилинди.
Ҳисобот якунида туман марказида замонавий “Капсула кутубхона” ташкил этиш учун “Ёшлар дафтари” жамғармаси ҳисобидан 250 млн сўм, шунингдек, “Ёшлар ойлиги” доирасида тадбирлар ва фестивалларни ташкил этиш учун 100 млн сўм маблағ ажратиш масаласини навбатдаги сессия кун тартибига киритиш таклифи билдирилди.