Xalq deputatlari Ishtixon tumani Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasining navbatdagi yig‘ilishida O‘zbekiston Respublikasi Prezidentining 2022-yil 24-apreldagi PQ-215-sonli qarori ijrosi yuzasidan Ishtixon tumani Sog‘liqni saqlash bo‘limi boshlig‘i o‘rinbosari B.Abdurazzaqovning hisoboti eshitildi.

Hisobotda 2025-yil davomida tumanda sog‘liqni saqlash tizimini takomillashtirish, aholiga ko‘rsatilayotgan tibbiy xizmatlar sifatini oshirish, kasalliklarni erta aniqlash, profilaktika va emlash tadbirlarini kengaytirish borasida amalga oshirilgan ishlar yuzasidan batafsil ma’lumot berildi.

Ta’kidlanganidek, bugungi kunda tumanning 281 ming nafardan ortiq aholisiga 30 ta davlat tibbiyot muassasasi xizmat ko‘rsatmoqda. Sohada jami 1 883 nafar tibbiyot xodimi faoliyat yuritmoqda. Hisobot davrida 25 ta oilaviy poliklinikada birlamchi tibbiy xizmat ko‘rsatishning yangi modeli joriy etilib, 264 ming nafardan ortiq fuqaro bilan oila shifokorlari o‘rtasida bitimlar tuzilgan.

Shuningdek, tumanda zamonaviy markazlashgan laboratoriya ishga tushirilgani, poliklinikalarga murojaatlar soni sezilarli oshgani, tez tibbiy yordamga murojaatlar va shifoxonaga yotqizish holatlari kamaygani qayd etildi. Tibbiyot muassasalarida raqamlashtirish ishlari jadallashib, barcha davlat tibbiyot muassasalarida “DMED” yagona tibbiyot axborot tizimi joriy etilganligi ma’lum qilindi.

Muhokamalar davomida sohadagi mavjud muammolar ham ochiq tahlil qilindi. Jumladan, ayrim oilaviy poliklinikalarning ta’mirtalab holati, ayrim mutaxassisliklar bo‘yicha kadrlar yetishmovchiligi hamda xususiy tibbiyot muassasalarini davlat tibbiy sug‘urtasi tizimiga jalb etish masalalariga alohida e’tibor qaratildi.

Hisobotda 2026-yilda amalga oshiriladigan ustuvor vazifalar ham belgilab berildi. Xususan, 6 ta oilaviy poliklinikada qurilish va rekonstruksiya ishlarini yakunlash, vakant shifokorlik o‘rinlarini to‘ldirish, onalar va bolalar salomatligi ko‘rsatkichlarini yaxshilash, yangi davlat-xususiy sheriklik loyihalarini amalga oshirish hamda raqamli tibbiyot xizmatlarini yanada kengaytirish rejalashtirilgani ma’lum qilindi.

Yig‘ilish yakunida doimiy komissiya a’zolari tomonidan hisobot yuzasidan tegishli tavsiya va takliflar bildirilib, sog‘liqni saqlash sohasida belgilangan vazifalar ijrosini ta’minlash masalalari deputatlik nazoratiga olindi.

Bizni ijtimoiy tarmoqlarda kuzating:

Telegramm (https://t.me/Ishtixon_tuman_Kengashi) | Web-sayt (https://kengash.gov.uz/ishtixon) | Facebook (https://www.facebook.com/share/1Aq9YsjUr2/) | Instagram (https://www.instagram.com/ishtixontumanikengashi?utm_source=qr&igsh=ZDZ4YjJvd3k3aGp2)