Aholi bandligini ta’minlash masalasi sessiya oldi o‘rganish doirasida muhokama qilindi

2026-yil 21-avgust kuni Xalq deputatlari Namangan shahar Kengashidagi O‘zLiDeP deputatlik guruhining navbatdagi yig‘ilishi bo‘lib o‘tdi.

Yig‘ilishda Xalq deputatlari Namangan shahar Kengashi Kotibiyati mudiri N. Ubaydullaev, shuningdek, Xalq deputatlari Namangan shahar Kengashi deputatlari S. Gapparova va X. Toshmatova ishtirok etdi.

Yig‘ilish davomida navbatdagi Kengash sessiyasida ko‘rib chiqilishi rejalashtirilgan aholi bandligini ta’minlash masalasi sessiya oldi o‘rganish doirasida atroflicha muhokama qilindi.

Jumladan, shaharda aholi bandligini ta’minlash, yangi ish o‘rinlarini yaratish, ishsiz fuqarolarni mehnat faoliyatiga jalb etish hamda aholi daromadlarini oshirish borasida amalga oshirilayotgan ishlar tahlil qilindi.

Muhokamalar jarayonida fuqarolarni kasb-hunarga o‘qitish, ularni doimiy daromad manbalariga ega bo‘lishiga ko‘maklashish, tadbirkorlik faoliyatini rivojlantirish orqali yangi ish o‘rinlarini yaratish hamda mahallalarda bandlik bilan bog‘liq muammolarni manzilli hal etish masalalariga alohida e’tibor qaratildi.

Shuningdek, mas’ul tashkilotlar tomonidan amalga oshirilayotgan ishlarning samaradorligi, belgilangan vazifalar ijrosi hamda mavjud muammolarni bartaraf etish bo‘yicha ko‘rilayotgan choralar yuzasidan fikr almashildi.

Yig‘ilish yakunida sessiyada ko‘rib chiqiladigan masala bo‘yicha zarur ma’lumotlarni umumlashtirish, mavjud muammolarni aniqlash hamda ularni amaliy hal etish yuzasidan tegishli taklif va tavsiyalarni shakllantirish bo‘yicha vazifalar belgilab olindi.