Xalq deputatlari Boyovut tumani Kengashining Media-rejasiga muvofiq, tuman deputatlari ishtirokida yoshlar bilan ochiq muloqot tashkil etildi.
Unda Kengash kotibiyat mudiri X.Berdiyarova, tuman deputatlari A.Amanlikov, E.Erkaboyev hamda Yoshlar ishlari agentligi Boyovut tumani bo‘limi rahbari A.Jabarov ishtirok etdi.

Muloqot davomida Kengash kotibiyat mudiri X.Berdiyarova mahalliy Kengash deputatlarining mahallalarda aholi turmush darajasini yaxshilash, fuqarolarni qiynab kelayotgan muammolarni aniqlash va ularni hal etish borasidagi faoliyati haqida ma’lumot berdi.

Xususan, bugungi kunda tuman Kengashida 25 nafar deputat faoliyat yuritayotgani, deputatlar o‘z saylov okruglarida saylovchilar bilan muntazam muloqot qilib, ularning murojaatlari, muammo va takliflarini o‘rganib, ijobiy hal etish yuzasidan tegishli tashabbuslarni ilgari surayotgani ta’kidlandi.

Joriy yil boshidan buyon deputatlar tomonidan fuqarolardan kelib tushgan masalalar yuzasidan 166 ta deputat so‘rovi tegishli tashkilot va mas’ullarga yuborilgani hamda ularning 63 tasi ijobiy hal etilgani qayd etildi. Bu boradagi ishlar deputatlarning saylovchilar bilan bevosita muloqotini kuchaytirish, hududlarda mavjud muammolarni manzilli o‘rganish va ularning yechimini ta’minlashdagi amaliy faoliyatining muhim yo‘nalishlaridan biri ekani ta’kidlandi.

Shundan so‘ng tuman deputati A.Amanlikov tomonidan yoshlar bandligini ta’minlash masalasiga to‘xtalib, tumandagi mavjud bo‘sh ish o‘rinlari, ishga joylashish imkoniyatlari hamda yoshlar uchun yaratilayotgan mehnat sharoitlari haqida ma’lumot berildi. Yoshlarni o‘z qiziqish va qobiliyatlariga mos kasb-hunar egallashga, mavjud imkoniyatlardan samarali foydalanishga chaqirildi.

Muloqot davomida 2 nafar yosh ish bilan ta’minlash masalasida murojaat qildi. Murojaatlar yuzasidan tegishli tashkilotlar bilan hamkorlikda amaliy yordam ko‘rsatish choralari belgilandi.

Shuningdek, Yoshlar ishlari agentligi Boyovut tumani bo‘limi rahbari A.Jabarov tomonidan murojaat qilgan yoshlardan birining hozirda oliy ta’lim muassasasining 5-bosqichida tahsil olayotgani ma’lum qilinib, o‘qishni tamomlagach, mutaxassisligi bo‘yicha ishga joylashishida amaliy yordam ko‘rsatish bo‘yicha kelishib olindi.

Uchrashuv davomida tuman deputati E.Erkaboyev yoshlarga murojaat qilib, kasb tanlash masalasiga mas’uliyat bilan yondashish, shoshilmasdan o‘z qiziqishi va qobiliyatini to‘g‘ri baholash, zamonaviy hamda kelajakda talab yuqori bo‘ladigan kasblarni tanlab, puxta bilim va ko‘nikmalarni egallash muhimligini ta’kidladi.

Uchrashuv yakunida Yoshlar ishlari agentligi Boyovut tumani bo‘limi rahbari A.Jabarov uchrashuvni mazmunli va ochiq muloqot ruhida tashkil etgani uchun tuman deputatlariga minnatdorlik bildirdi. Shuningdek, yoshlar bilan bunday uchrashuvlarni muntazam ravishda tashkil etib borish, ularning muammo va takliflarini bevosita o‘rganish muhimligini ta’kidlab, kelgusida ham hamkorlikdagi muloqotlarni davom ettirishni taklif etdi.

Samimiy suhbat, ochiq fikr almashinuvi va yoshlarning takliflariga e’tibor qaratilgani uchrashuv ishtirokchilarida iliq taassurot qoldirdi.