“Dashtbog‘” mahallasida kriminogen vaziyatni yaxshilash bo‘yicha olib borilayotgan ishlar tanqidiy tahlil qilindi

Xalq deputatlari Namangan shahar Kengashi deputati, Namangan shahar hokimi Ayubxon Kamalov, shahar Ichki ishlar boshqarmasi boshlig‘i Ilhomjon Sotvoldiyev hamda shahar prokurori o‘rinbosari Abdurahmon Siddiqov “Dashtbog‘” mahallasida kriminogen vaziyatni barqarorlashtirish, huquqbuzarliklarni barvaqt aniqlash va jinoyatchilikning oldini olish borasida amalga oshirilayotgan ishlar yuzasidan o‘tkazilgan taqdimot bilan tanishdilar.

Taqdimot davomida mahallada huquqbuzarliklar profilaktikasini kuchaytirish, aholi murojaatlari bilan ishlash, ijtimoiy muammolarni o‘z vaqtida aniqlash hamda jinoyatchilikka sabab bo‘layotgan omillarni bartaraf etish yuzasidan amalga oshirilayotgan ishlar tanqidiy tahlil qilindi.

Shuningdek, mahalla profilaktika inspektori tomonidan xizmat faoliyati davomida yo‘l qo‘yilgan kamchiliklar muhokama qilinib, mavjud muammolarni bartaraf etish, profilaktik tadbirlar samaradorligini oshirish, mas’uliyatni yanada kuchaytirish hamda mahallani jinoyatchilikdan xoli hududga aylantirish bo‘yicha aniq vazifalar va tegishli ko‘rsatmalar berildi.

Ta’kidlanganidek, huquqni muhofaza qiluvchi organlar, mahalla faollari va jamoatchilikning o‘zaro hamkorligini yanada mustahkamlash, har bir xonadon bilan manzilli ishlash orqali mahallada tinch va osoyishta muhitni ta’minlash ustuvor vazifa hisoblanadi.