Xalq deputatlari Qo‘qon shahar Kengashi deputati X.Abdullayev tomonidan aholini bepul dori-darmon vositalari bilan ta’minlash hamda ehtiyojmand fuqarolarni qo‘llab-quvvatlash yuzasidan yuborilgan deputatlik so‘roviga Qo‘qon shahar Tibbiyot birlashmasi boshlig‘i K.B.Sirojiddinov tomonidan rasmiy javob taqdim etildi.

So‘rov asosida tibbiyot muassasalarida imtiyozli toifaga mansub bemorlarni bepul dori-darmon bilan ta’minlash va dori vositalaridan maqsadli foydalanish holati o‘rganildi.

Javob xatida bemorlarning dori-darmonga bo‘lgan ehtiyoji tibbiy holati va kasallik turidan kelib chiqib shakllantirilishi, imtiyozli toifadagi fuqarolar doimiy hisobga olinishi hamda surunkali xastaligi bor va uzoq muddatli davolanishga muhtoj bemorlar belgilangan tartibda dori vositalari bilan ta’minlanayotgani ma’lum qilindi.

Shuningdek, bepul dori olish huquqiga ega fuqarolar ro‘yxatini muntazam yangilash, dori vositalarining zaxirasi va sarfini nazorat qilish, retsept asosida dori olish tartibi bo‘yicha tushuntirish ishlarini olib borish hamda aniqlangan muammolarni o‘z vaqtida bartaraf etish choralari belgilangan.

Mazkur masala deputat nazoratida bo‘lib, aholini bepul dori-darmon vositalari bilan ta’minlash va tibbiy xizmat sifatini oshirish borasidagi ishlar davom ettiriladi.

Xalq deputatlari Qo‘qon shahar Kengashi