#deputat_soʻrovi #poytaxtdeputatlari #deputatlik_faoliyati

❗️Boyqo‘rg‘on mahallasida temir yo‘l bo‘yidagi aholi xavfsizligi masalasi deputatlik so‘rovlari orqali ko‘tarildi

🏛 Xalq deputatlari Toshkent shahar Kengashi deputati Sadriddin Turabjanov tomonidan Yashnobod tumani “Boyqo‘rg‘on” mahallasidagi Temiryo‘l ko‘chasining temir yo‘lga tutash qismida aholi xavfsizligini ta’minlash masalasi yuzasidan mutasaddi tashkilotlar rahbarlariga deputatlik so‘rovlari yuborildi.

📨 Deputatlik so‘rovlari Toshkent shahar hokimining transport va yo‘l infratuzilmasi masalalari bo‘yicha o‘rinbosari A.A. Baxtiyev hamda Toshkent Mintaqaviy temir yo‘l uzeli boshlig‘i O.N. Xudoyqulov nomiga yo‘llandi.

📩 Mazkur masala “Boyqo‘rg‘on” mahallasida aholi bilan o‘tkazilgan uchrashuvda fuqarolar tomonidan ko‘tarilgan. Murojaatlarda Temiryo‘l ko‘chasining temir yo‘lga tutash qismida zarur muhofaza to‘siqlari mavjud emasligi sababli aholi, ayniqsa yosh bolalar va piyodalarning xavfsizligi bilan bog‘liq jiddiy xavotirlar mavjudligi bildirilgan.

🔎 Shuningdek, mazkur muammo yuzasidan 2026-yil 5-avgust kuni Xalq deputatlari Yashnobod tumani Kengashi tomonidan Xalq deputatlari Toshkent shahar Kengashiga 50-kx-422-26-sonli murojaat ham yuborilgan. Shundan so‘ng masala joyiga chiqib o‘rganilib, Temiryo‘l ko‘chasining temir yo‘lga tutash ayrim qismlarida panjara, yevrozabor yoki boshqa turdagi muhofaza to‘siqlari mavjud emasligi, natijada fuqarolarning temir yo‘l hududiga erkin kirib qolish xavfi yuqoriligi aniqlangan.

🔺 O‘rganish davomida ushbu uchastkaning bir tomonida muhofaza panjarasi o‘rnatilgani, boshqa qismida esa bunday himoya vositalari mavjud emasligiga ham e’tibor qaratildi. Shu sababli hududda xavfsizlik choralarini yaxlit tarzda tashkil etish zarurati yuzaga kelgan.

📝 Shu munosabat bilan deputat Sadriddin Turabjanov “Xalq deputatlari viloyat, tuman va shahar Kengashi deputatining maqomi to‘g‘risida”gi Qonunning 5 va 8-moddalariga asosan mutasaddi tashkilotlar oldiga Temiryo‘l ko‘chasining temir yo‘lga tutash qismida zarur muhofaza to‘siqlarini o‘rnatish imkoniyatini ko‘rib chiqish masalasini qo‘ydi.

🚉 Deputatlik so‘rovlarida Salor stansiyasining 3365-kilometr 2–10-piketlari oralig‘iga muhofaza panjarasi o‘rnatish, shuningdek, 3365-kilometr 6-piketida joylashgan piyodalar yo‘lakchasini ta’mirlash masalalarini o‘rganib, tegishli amaliy choralarni ko‘rish so‘ralgan.

📉 Bundan tashqari, agar mazkur uchastkada muhofaza to‘siqlarini o‘rnatish nazarda tutilmagan bo‘lsa, temir yo‘lning bir tomonida muhofaza panjarasi qanday asoslarda o‘rnatilganiga aniqlik kiritish hamda hududda fuqarolar xavfsizligini ta’minlash bo‘yicha asoslantirilgan munosabat bildirish talab etildi.

⏳ Deputatlik so‘rovlarida Toshkent shahar hokimining transport va yo‘l infratuzilmasi masalalari bo‘yicha o‘rinbosari A.A. Baxtiyev hamda Toshkent Mintaqaviy temir yo‘l uzeli boshlig‘i O.N. Xudoyqulovdan o‘rganish natijalari, ko‘riladigan choralar va rejalashtirilgan ishlar yuzasidan 10 kun muddatda tegishli ma’lumot taqdim etish so‘ralgan.

🤝 Mazkur masala deputat Sadriddin Turabjanov tomonidan nazoratga olingan bo‘lib, asosiy e’tibor temir yo‘lga tutash hududda fuqarolar, ayniqsa bolalar va piyodalarning xavfsiz harakatlanishi uchun zarur sharoitlarni yaratishga qaratilgan.

📱 Telegram 📱 Instagram 📱 Facebook 📱 YouTube 🔎 E-kengash