Xalq deputatlari Shovot tumani Kengashi deputatlari tomonidan hududlarda aholi bilan bevosita muloqot qilish, ularning murojaat va muammolarini joyiga chiqqan holda o‘rganish, shuningdek, mahallalarda obodonlashtirish va tozalikni ta’minlashga qaratilgan ishlar izchil davom ettirilmoqda.
Xalq deputatlari Shovot tumani Kengashi deputati Yo‘ldoshova Oyimjon Kurvonnozarovna tomonidan Kengashning tasdiqlangan haftalik ish rejasiga muvofiq Royat mahallasida o‘rganish ishlari olib borildi.
O‘rganish ishlari “Obod mahalla — obod ko‘cha, obod xonadon” shiori ostida tashkil etilib, mahalladagi sanitariya va obodonlashtirish holatiga alohida e’tibor qaratildi.
Xususan, maishiy va qattiq chiqindilarni o‘z vaqtida olib chiqib ketish, ko‘chalar va umumiy foydalanishdagi hududlarda tozalikni ta’minlash, har bir xonadon atrofi va hovli-joylarini obodonlashtirish masalalari yuzasidan aholi bilan suhbatlar o‘tkazildi.
Shuningdek, ko‘chalarda va xonadonlar atrofida tozalikni saqlash, chiqindilarni belgilangan joylarga tashlash, yashash hududlarini ozoda va ko‘rkam saqlash bo‘yicha fuqarolarga tushuntirish va targ‘ibot ishlari olib borildi.
O‘rganish davomida aholi murojaatlari ham tinglanib, fuqarolar tomonidan bildirilgan muammolar tegishli tartibda o‘rganildi. Hal etish imkoniyati mavjud bo‘lgan masalalar bo‘yicha amaliy ko‘mak ko‘rsatildi, qo‘shimcha o‘rganish talab etadigan murojaatlar esa nazoratga olindi.
Obodlik va tozalik — har bir xonadondan, har bir ko‘chadan boshlanadi. Zero, obod mahalla — farovon va munosib hayot garovidir!