Fuqarolar murojaatlari asosida kadastr masalalari bo‘yicha deputatlik so‘rovi yuborildi

O‘zbekiston Respublikasining 2014-yil 5-maydagi O‘RQ-371-son “Xalq deputatlari viloyat, tuman va shahar Kengashi deputatining maqomi to‘g‘risida”gi Qonunining 5 va 8-moddalari talablari asosida fuqarolarning murojaatlarida ko‘tarilgan masalalarni o‘rganish hamda ularning qonuniy huquq va manfaatlarini ta’minlash maqsadida Xalq deputatlari Navoiy shahar Kengashi deputati tomonidan Davlat kadastrlari palatasining Navoiy shahar filialiga deputatlik so‘rovi yuborildi.

Mazkur deputatlik so‘rovi 2026-yil 24-iyul kuni Navoiy shahri “Yoshlik” mahalla fuqarolar yig‘inida fuqarolar bilan o‘tkazilgan ko‘chma (sayyor) qabul davomida bildirilgan murojaatlar asosida tayyorlandi.

Qabul davomida fuqarolar tomonidan uy-joylarning kadastr hujjatlarini rasmiylashtirish, ko‘chmas mulk obyektlariga bo‘lgan huquqlarni davlat ro‘yxatidan o‘tkazish, yer uchastkalaridan foydalanish hamda ushbu yo‘nalishdagi mavjud muammolarni qonunchilik talablari asosida hal etish yuzasidan murojaatlar bildirildi.

Mazkur masalalarni ko‘rib chiqishda O‘zbekiston Respublikasining 1998-yil 30-apreldagi 598-I-son Yer kodeksi, 2004-yil 30-avgustdagi 675-II-son “Davlat kadastrlari to‘g‘risida”gi Qonuni, 2022-yil 28-noyabrdagi O‘RQ-803-son “Ko‘chmas mulk obyektlariga bo‘lgan huquqlarni davlat ro‘yxatidan o‘tkazish to‘g‘risida”gi Qonuni hamda 2017-yil 11-sentabrdagi O‘RQ-445-son “Jismoniy va yuridik shaxslarning murojaatlari to‘g‘risida”gi Qonuni talablariga amal qilish lozimligi qayd etildi.

Deputatlik so‘rovida mas’ul tashkilotdan fuqarolarning murojaatlarida ko‘rsatilgan holatlarni mutaxassislar ishtirokida har tomonlama va xolisona o‘rganish, uy-joy va yer uchastkalarining huquqiy holatiga amaldagi qonunchilik talablari asosida baho berish, aniqlangan muammolarni bartaraf etish yuzasidan tegishli choralar ko‘rish hamda ko‘rib chiqish natijalari to‘g‘risida belgilangan tartibda yozma ma’lumot taqdim etish so‘raldi.

Xalq deputatlari Navoiy shahar Kengashi deputatlari tomonidan fuqarolar murojaatlarini o‘rganish, ularning qonuniy huquq va manfaatlarini ta’minlash hamda mavjud muammolarni hal etishga ko‘maklashish borasidagi ishlar izchil davom ettirilmoqda.