Xalq deputatlari Qo‘qon shahar Kengashining "Ijtimoiy soha, yoshlar siyosati, madaniyat va sport masalalari bo‘yicha" doimiy komissiyasining navbatdagi yig‘ilishi bo‘lib o‘tdi.

Yig‘ilish kun tartibidagi asosiy masala sifatida Shahar Tibbiyot birlashmasining 2026-yilning 6 oyi davomida amalga oshirgan faoliyati to‘g‘risidagi hisoboti muhokama qilindi.

Hisobot davomida shahar aholisiga ko‘rsatilayotgan birlamchi va ixtisoslashtirilgan tibbiy xizmatlar sifati, davolash-profilaktika muassasalari faoliyati, aholini dori-darmon vositalari bilan ta’minlash, tibbiyot muassasalarida yaratilgan shart-sharoitlar hamda tibbiy xizmatlar sifatini oshirish borasida amalga oshirilgan ishlar yuzasidan batafsil axborot berildi.

Muhokama jarayonida doimiy komissiya a’zolari tomonidan tibbiyot muassasalarida olib borilgan o‘rganishlar natijalari, fuqarolar tomonidan bildirilayotgan murojaatlar hamda mavjud muammolar yuzasidan mas’ullarga qator savollar berildi. Xususan, tibbiy xizmatlar sifatini yanada yaxshilash, bepul dori-darmonlar ta’minoti, shifoxonalarning moddiy-texnik bazasini mustahkamlash, tibbiyot muassasalarida sanitariya-gigiyena talablariga rioya etilishi va bemorlar uchun yaratilgan sharoitlarni yanada yaxshilash masalalariga alohida e’tibor qaratildi.

Yig‘ilish yakunida hisobot yuzasidan deputatlar tomonidan tegishli taklif va tavsiyalar bildirilib, aniqlangan kamchiliklarni bartaraf etish hamda aholiga ko‘rsatilayotgan tibbiy xizmatlar sifati va samaradorligini oshirish bo‘yicha mas’ul tashkilotlarga tegishli vazifalar belgilandi.

Doimiy komissiya tomonidan mazkur masala yuzasidan tegishli xulosa qabul qilinib, Shahar Tibbiyot birlashmasi boshlig‘ining hisobotini Xalq deputatlari Qo‘qon shahar Kengashining navbatdagi sessiyasida ko‘rib chiqish tavsiya etildi.

Xalq deputatlari Qo‘qon shahar Kengashi