Xalq deputatlari Qo‘qon shahar Kengashi raisi va deputati Yu.To‘ychiyev tomonidan saylovchilar murojaatlari asosida navbatdagi deputatlik so‘rovi yuborildi.

Deputatning "Chorchinor" mahalla fuqarolar yig‘inida o‘tkazgan uchrashuvlari hamda joyiga chiqib olib borgan o‘rganishlari davomida fuqarolar tomonidan "Chorchinor" va "Temir yo‘lchi" mahalla fuqarolar yig‘inlari chegaralarini belgilash masalasi yuzasidan murojaatlar bildirildi.

Murojaatlarda mahalla chegaralari to‘liq belgilanmaganligi sababli ayrim fuqarolar va tadbirkorlar uchun soliq, kredit, subsidiya hamda boshqa davlat xizmatlaridan foydalanishda amaliy muammolar yuzaga kelayotgani qayd etildi.

Mazkur murojaatlar yuzasidan O‘zbekiston Respublikasining “Xalq deputatlari viloyat, tuman va shahar Kengashi deputatining maqomi to‘g‘risida”gi Qonuni talablariga muvofiq, Qo‘qon shahar hokimining birinchi o‘rinbosari O.Qurbonov nomiga deputatlik so‘rovi yuborildi.

Deputatlik so‘rovida O‘zbekiston Respublikasi Vazirlar Mahkamasining 2024-yil 20-maydagi 294-son qarori hamda Xalq deputatlari Farg‘ona viloyati Kengashining tegishli qarori ijrosi doirasida "Chorchinor" va "Temir yo‘lchi" mahalla fuqarolar yig‘inlari chegaralarini belgilash bo‘yicha amalga oshirilayotgan ishlar, ko‘rilayotgan chora-tadbirlar hamda ushbu jarayonni yakunlash muddatlari yuzasidan asoslantirilgan ma’lumot taqdim etish so‘ralgan.

Mazkur masala deputat nazoratiga olingan bo‘lib, uning ijrosi yuzasidan amalga oshirilayotgan ishlar va natijalar haqida jamoatchilikka qo‘shimcha ma’lumotlar berib boriladi.

Xalq deputatlari Qo‘qon shahar Kengashi