KO‘CHALARNI YORITISH TIZIMI BO‘YICHA O‘RGANISH O‘TKAZILDI

Xalq deputatlari Ohangaron tumani Kengashi “7-Quyun” saylov okrugi deputati Mirzavaliyev Abbos Shavkatovich ishtirokida Quyun mahalla fuqarolar yig‘ini hududida ko‘chalarni tungi vaqtda yoritish holati yuzasidan ham deputatlik nazorati tadbiri o‘tkazildi.

O‘rganish jarayonida mahalladagi asosiy va ichki ko‘chalarda o‘rnatilgan tashqi yoritish chiroqlarining ishlash holati, aholi xavfsizligi uchun muhim bo‘lgan hududlarning yoritilganlik darajasi hamda qo‘shimcha yoritish vositalariga bo‘lgan ehtiyojlar tahlil qilindi.

Aniqlangan kamchiliklar asosida ayrim ko‘chalarda mavjud yoritish tarmoqlarini ta’mirlash, nosoz chiroqlarni almashtirish, qo‘shimcha simyog‘och va energiya tejamkor LED yoritish uskunalarini o‘rnatish bo‘yicha takliflar ishlab chiqildi. Mazkur chora-tadbirlar aholining xavfsiz harakatlanishini ta’minlash, huquqbuzarliklar va yo‘l-transport hodisalarining oldini olish, mahalla hududining obod va zamonaviy qiyofasini shakllantirishga xizmat qilishi ta’kidlandi.

Shu bilan birga, mahalla yettiligi va mas’ul tashkilotlar vakillariga aniqlangan muammolarni bartaraf etish hamda yoritish tizimini yanada takomillashtirish yuzasidan tegishli tavsiyalar berildi.