Xalq deputatlari Parkent tumani Kengashiga 13-“Istiqbol” saylov okrugidan saylangan deputat Maxmudova Baxtinisa Zuxriddinovna tomonidan o‘zi saylangan hudud “Istiqbol” mahallasida aholini kambag‘allikdan chiqarish, ularning daromad manbalarini kengaytirish hamda turmush darajasini yaxshilash borasida olib borilayotgan ishlar yuzasidan o‘rganish va tahlil ishlari amalga oshirildi. Xususan, “Kambag‘allikdan farovonlik sari” dasturi doirasida “mahalla yettiligi” tomonidan amalga oshirilayotgan chora-tadbirlar, aholiga ajratilayotgan imtiyozli kreditlarning maqsadli va manzilli yo‘naltirilishi holati deputat tomonidan bevosita joyiga chiqqan holda o‘rganildi. O‘rganishlar davomida oilaviy tadbirkorlikni rivojlantirish dasturlari asosida fuqarolarga ajratilgan kredit mablag‘larining samaradorligiga alohida e’tibor qaratildi. Jumladan, “Istiqbol” MFY fuqarosi I.Abdullayev tomonidan 20 million so‘m miqdorida olingan imtiyozli kredit hisobiga non mahsulotlari tayyorlash uchun zamonaviy non yasash apparati xarid qilinib, ushbu faoliyat yo‘lga qo‘yilgani aniqlandi. Natijada, fuqaro tomonidan yo‘lga qo‘yilgan tadbirkorlik faoliyati samarali tashkil etilib, qo‘shimcha daromad manbai yaratilgani hamda oilaning iqtisodiy ahvoli sezilarli darajada yaxshilangani kuzatildi. Mazkur o‘rganishlar hokim yordamchilari va “mahalla yettiligi” tomonidan olib borilayotgan ishlarning natijadorligi ortib borayotganini ko‘rsatmoqda. Shu bilan birga, kelgusida ham bu boradagi ishlarni tizimli davom ettirish, aholining bandligini ta’minlash va ularni tadbirkorlikka keng jalb etish muhim ahamiyat kasb etadi.