Avval xabar qilinganidek, tuman Kengashi deputati Muattar Mirzajonova tomonidan Boyovut tumani “Bunyodkor” mahallasida joylashgan bolalar o‘yingohi hududidagi muammo yuzasidan deputat so‘rovi yuborilgan edi.

Mazkur so‘rov ijrosi yuzasidan bugun tuman hokimi o‘rinbosari Avazbek Alashukurov, tuman deputati, kotibiyat mudiri hamda mutaxassislar ishtirokida muammoni joyida atroflicha o‘rgandi.

O‘rganish jarayonida o‘yingoh hududida yog‘ingarchilik natijasida suv to‘planib qolayotgani, bu esa bolalar va yoshlar uchun noqulaylik tug‘dirayotgani yana bir bor ko‘zdan kechirildi.

Tuman hokimi o‘rinbosari tomonidan mazkur sport maydonchasini ta’mirlash, hududni obodonlashtirish hamda zamonaviy workout va boshqa sport uskunalari bilan jihozlash bo‘yicha zarur chora-tadbirlar amalga oshirilishi ta’kidlandi.

Mazkur masala ijrosi doimiy nazoratga olinib, belgilangan ishlarning o‘z vaqtida va sifatli bajarilishi ta’minlanadi.