Bahor nafasi kirib kelgan ayni kunlarda Ishtixon tumanida 8-Mart – Xalqaro xotin-qizlar kuni munosabati bilan tantanali bayram tadbiri ko‘tarinki ruhda nishonlandi. Tuman hokimligida tashkil etilgan mazkur uchrashuv ayollarga bo‘lgan yuksak hurmat va ehtiromning yana bir ifodasi bo‘ldi.

Tadbirda tumanning turli sohalarida samarali faoliyat yuritib kelayotgan, o‘z mehnati va tashabbuskorligi bilan jamiyat taraqqiyotiga munosib hissa qo‘shayotgan xotin-qizlar bilan bir qatorda Xalq deputatlari Ishtixon tumani Kengashi deputatlari ham ishtirok etdilar.

Uchrashuv davomida xotin-qizlarning ta’lim, tibbiyot, tadbirkorlik, mahalla va jamoatchilik hayotidagi faolligi alohida e’tirof etildi. So‘zga chiqqanlar ayolning oiladagi o‘rni, yosh avlod tarbiyasidagi beqiyos hissasi hamda jamiyat barqarorligidagi muhim rolini alohida ta’kidladilar. Shuningdek, deputatlar tomonidan ayollarni qo‘llab-quvvatlash, ularning ijtimoiy faolligini oshirish borasida olib borilayotgan ishlar ham qayd etildi.

Bayram tadbiri davomida san’atkorlar tomonidan taqdim etilgan rang-barang konsert dasturi yig‘ilganlarga ko‘tarinki kayfiyat ulashdi. Dilbar kuy-qo‘shiqlar va bahorni tarannum etgan sahna chiqishlari davraga o‘zgacha fayz bag‘ishladi.

🌸 Bunday ehtirom va e’tibor ayollarning jamiyatdagi o‘rni naqadar ulug‘ ekanini yana bir bor namoyon etdi.