Yoshlar tashabbuslari – Yangi O‘zbekiston kelajagining mustahkam poydevori

2026-yil 26-fevral kuni Oliy Majlis Qonunchilik palatasi deputati Aminova Aziza Marksovna hamda Xalq deputatlari Navoiy shahar Kengashi deputati G. Xasanovalar "Profi University" Navoiy Filialida bo‘lib, yoshlar bilan mazmunli uchrashuv o‘tkazdilar.

Tadbir “Yoshlar tashabbuslari – Yangi O‘zbekiston kelajagining mustahkam poydevori” mavzusida tashkil etildi. Unda talabalar, yosh tadbirkorlar, faol yoshlar ishtirok etdilar. Uchrashuv avvalida so‘z olgan deputatlar 2026-yil 24-fevral kuni Ko‘ksaroy qarorgohida mamlakatimiz Prezidenti tomonidan yoshlar bilan o‘tkazilgan ochiq muloqotning ahamiyatiga to‘xtaldilar. Ta’kidlanganidek, mazkur uchrashuv yoshlar siyosatida yangi bosqichni boshlab bergan, amaliy qarorlar va aniq moliyaviy imkoniyatlar bilan boyitilgan tarixiy voqea sifatida e’tirof etildi.Muloqot davomida yoshlar bandligini ta’minlash, ularning tadbirkorlik tashabbuslarini qo‘llab-quvvatlash, startap loyihalarni moliyalashtirish, ta’lim sifatini oshirish hamda iqtidorli yoshlarni rag‘batlantirishga qaratilgan yangi mexanizmlar haqida atroflicha ma’lumot berildi. Shuningdek, davlat tomonidan ajratilayotgan imtiyozli kreditlar, grantlar va subsidiyalar yoshlar uchun keng imkoniyatlar eshigini ochayotgani alohida qayd etildi. Tadbir jarayonida talabalar o‘zlarini qiziqtirgan savollar bilan murojaat qilib, qonunchilikka oid taklif va tashabbuslarini bildirdilar. Deputatlar tomonidan har bir murojaat yuzasidan aniq tushuntirishlar berildi, amaliy takliflar qo‘llab-quvvatlanishi ta’kidlandi. Uchrashuv davomida bir fikr alohida urg‘u bilan ta’kidlandi: yoshlar nafaqat kelajak egalari, balki bugungi islohotlarning faol ishtirokchilari hamdir. Yangi O‘zbekiston taraqqiyoti, avvalo, bilimli, tashabbuskor va vatanparvar yoshlar qo‘lida ekani qayd etildi. Tadbir yakunida yoshlar tashabbuslarini qo‘llab-quvvatlash, ularning g‘oya va takliflarini amaliyotga joriy etish bo‘yicha hamkorlikni yanada kuchaytirishga kelishib olindi.Mazkur uchrashuv yoshlarda yuksak fuqarolik pozitsiyasini shakllantirish, ularning ijtimoiy-siyosiy jarayonlardagi faolligini oshirish hamda Yangi O‘zbekiston taraqqiyotiga daxldorlik hissini mustahkamlashga xizmat qildi.