Dehqonobod tumanida xalq deputatlari mahalliy Kengashi deputatlari tomonidan kiritilgan so‘rovlar ijrosi va ularning samaradorligini tahlil qilish masalasiga bag‘ishlangan yig‘ilish bo‘lib o‘tdi. Mazkur yig‘ilish Xalq deputatlari Dehqonobod tuman Kengashining Reglament va deputatlik odob-axloqi masalalari bo‘yicha doimiy komissiya raisi G‘.Boysariyev rahbarligida tashkil etildi.

Yig‘ilishda mutasaddi tashkilotlar rahbarlari, deputatlar hamda mas’ul xodimlar ishtirok etib, aholi murojaatlariga munosabat va deputatlik so‘rovlarining amaldagi natijalari muhokama qilindi. Ta’kidlanganidek, 2026-yilning yanvar–fevral oylari davomida tuman deputatlari tomonidan o‘z saylov okruglaridagi mavjud muammolar yuzasidan tegishli tuman tashkilotlariga jami 16 ta deputatlik so‘rovi yuborilgan.
Tahlillar shuni ko‘rsatdiki, ayrim hollarda deputatlik so‘rovlari ijrosi rasmiyatchilikdan nariga o‘tmayotgani, mas’ul tashkilotlar tomonidan muammolarni hal etishda sustkashlikka yo‘l qo‘yilayotgani tanqid qilindi. Xususan, infratuzilma, kommunal xizmatlar va aholini qiynayotgan ijtimoiy masalalar yuzasidan yuborilgan so‘rovlarga javob berishda kechikishlar mavjudligi qayd etildi.

Yig‘ilish davomida ayrim mutasaddilarning faoliyati keskin tanqid ostiga olinib, deputatlik nazoratini kuchaytirish, har bir so‘rov ijrosini aniq muddatlar asosida ta’minlash hamda aholi manfaatlarini ustuvor vazifa sifatida belgilash zarurligi ta’kidlandi. Shuningdek, muammolarni joyida o‘rganish va ularga amaliy yechim topish bo‘yicha aniq chora-tadbirlar belgilab olindi.

Ta’kidlash joizki, deputatlik so‘rovlari — bu faqat hisobot uchun emas, balki aholining dardu tashvishlarini hal etishga qaratilgan ta’sirchan mexanizm bo‘lishi kerak. Shu nuqtai nazardan, har bir murojaat ortida inson taqdiri turganini unutmasdan, mas’ul idoralar o‘z faoliyatini qayta ko‘rib chiqishi, amaliy natijaga yo‘naltirilgan ish uslubini yo‘lga qo‘yishi talab etiladi.

Yig‘ilish yakunida mas’ullarga aniq topshiriqlar berildi hamda deputatlik so‘rovlari ijrosini tizimli nazorat qilish orqali hududdagi ijtimoiy-iqtisodiy muammolarni bartaraf etish bo‘yicha ishlar yanada kuchaytirilishi belgilandi.