Huquqiy demokratik davlat tashkil etish, xalqni adolat va to‘g‘rilik bilan boshqarish, qonunlar orqali odamlarni adolatga, yaxshi yashashga undash, ularni ishli va farovon qilish g‘oyasi juda qadim zamonlardan buyon mavjud.  

Bugungi davlatimizda olib borilayotgan o‘zgarishlar va islohotlarni kuzatgan, ulardan ta’sirlangan odam borki, bu jarayonlarga befarq bo‘lolmaydi. Davlatimiz rahbari “Adolat” so‘zi va “Adolat bilan ish olib borish” haqida juda ko‘p gapiradilar. Xalq davlat idoralariga emas, davlat idoralari xalqqa xizmat qilishi kerak, degan ezgu g‘oya bugun mamlakatimizning barcha qishlog‘u shaharlarida birdek aks sado bermoqda. Xo‘sh, adolat bilan biz yuqorida eslagan qoidaning o‘rtasida qanday bog‘liqlik bor? 

Aytish kerakki, yangi tahrirdagi Konstitutsiyamizning 2-moddasida ham bu haqda gapirilgan bo‘lib, “Davlat xalq irodasini ifoda etib, uning manfaatlariga xizmat qiladi. Davlat organlari va mansabdor shaxslar jamiyat va fuqarolar oldida mas’uldirlar” deya belgilab qo‘yilgandir. Shundan ham ko‘rinib turibdiki, bugungi islohotlarimizning bosh maqsadi, xalqimiz irodasini ifoda etish, davlat organlari va mansabdor shaxslarning jamiyatimiz oldida mas’ulligini oshirishdir. Qancha sayyor qabullarda ishtirok etamiz, mamlakatimizda mahallabay ishlash tizimi yo‘lga qo‘yilib, odamlarning uylarigacha kirilib, ularning muammolari o‘rganilmoqda, yoshlarimiz mahallalar bo‘yicha xatlovdan o‘tkazilib, ularni turli guruhlarga ajratilib, ishga muhtoj, kasalmand, ishga yaroqsiz, yordamga muhtoj, hatto tadbirkorlikka ehtiyojmandlari ham aniqlanib, bu borada dasturlar tayyorlanmoqda. Ularning qobiliyatlarini har tomonlama oshirish choralari ko‘rilmoqda. Ko‘rasizki, yilimiz oxiriga borib, bu yoshlarning har birining ma’naviy, moddiy va boshqa ehtiyojlari qoniqtirilib, ularga har tomonlama yordam beriladi. 

Shuningdek, xalq deputatlari tuman, shahar va viloyat Kengashlari maqomini ko‘tarish, davlat organlari rahbarlarining saylovchilar saylagan deputatlar oldida hisobdorligini oshirish, davlat organlari qanday ish olib borayapti, qanday reja va dasturlar asosida ish olib bormoqchi, qanday maqsadlari bor, soha olidagi muammo va yutuqlar, xullas, hisob berayotgan korxona, tashkilot rahbarlarining hisobotlari har tomonlama eshitilib, xulosa va qarorlar chiqarilmoqda. 

Keyingi paytlarda jamiyatimizda deputatlarga e’tibor nihoyatda kuchaydi. Endi o‘zini bilgan, jamiyatdagi o‘zgarishlarga befarq bo‘lmagan deputat sessiyada faqat ovoz beruvchi emas, u har bir masalaga o‘zini mas’ul deb biladigan, shu shahar, shu tuman kelajagi uchun o‘zini ham javobgar biluvchi xalq saylagan va ishongan, odamlarning ishonchini oqlovchi shaxsdir. Shu ma’noda deputatlarimiz oldida juda katta vazifalar turibdi. Bularga saylovchilar bilan uzviy aloqada bo‘lish, jamiyatdagi jarayonlarni diqqat bilan kuzatib borish, hududdagi muammolarni besh qo‘liday bilish, shu muammo va masalalarning yechimini izlash, odamlarning murojaatlari bo‘yicha davlat organlariga muammo qo‘ya olish, hudud muammolarining yechimini topa oladigan vaziyatlarga erishish va boshqalardir. 

Saylov shuning uchun saylovki, unda xalq ham, o‘z nomzodini shu odamlar muammolari bilan ishlay olaman, degan ishonchdagi nomzodlar ham o‘z ortiga bir boqib, kechagi hayotdan bugungisining farqini o‘ylab, bugun dolzarb bo‘lib turgan masalalar atrofida birgalikda fikr yuritib, hamkorlik qila olish qoidasini tamoyil qilib olib, shu borada shaxt ko‘rsatish, shu vatan, shu millat, shu jonajon davlatimiz kelajagi, tinchligi, rivojlanishi, odamlarning farovonligi uchun bir tanu bir jon bo‘lib ishlay olish tafakkurini in’om etadi, saylov bu o‘z-o‘ziga javobgarlik, masalalarni yana bir bor qalb qo‘ridan o‘tkazishdir. 

Azamat TAVBOEV, Xalq deputatlari Payariq tuman Kengashi deputati