Shaxsiy qabullar — murojaatlarga manzilli yechim topishning muhim vositasi

Kecha, 4-avgust kuni O‘zbekiston Respublikasi Prezidentining Termiz tumanidagi Xalq qabulxonasi binosida tuman hokimi Shuhrat Qalandarovning fuqarolar uchun navbatdagi shaxsiy qabuli o‘tkazildi.
Qabul davomida 31 nafar fuqaroning 34 ta murojaati tinglanib, ularning uy-joy, bandlik, ijtimoiy himoya, kommunal xizmatlar va boshqa sohalarga oid masalalari ko‘rib chiqildi. Murojaatlarning 5 tasi qabul jarayonining o‘zida ijobiy hal etildi.

Mazkur shaxsiy qabulda Xalq deputatlari Termiz tuman Kengashi deputati G. Shafoatova ham ishtirok etib, fuqarolar tomonidan bildirilgan murojaatlarni tingladi hamda ularning qonuniy va manzilli hal etilishi yuzasidan o‘z taklif va tavsiyalarini bildirdi.

Qo‘shimcha o‘rganish va muayyan muddat talab qiladigan masalalar bo‘yicha mas’ul tashkilot va mutasaddilarga aniq topshiriqlar berildi. Ularning ijrosi belgilangan tartibda nazoratga olindi.

Fuqarolar murojaatlarini joyida o‘rganish, har bir masalaga individual yondashish hamda ularni qonuniy asosda hal etish borasidagi ishlar izchil davom ettiriladi.