Xalq deputatlari Margʻilon shahar Kengashi deputati A.Mahkamov oʻz saylov okrugi hududida joylashgan Ipak yoʻli mahalla fuqarolar yigʻinida aholi, ayniqsa, yoshlar uchun yaratilgan sport infratuzilmasi holatini oʻrgandi.
Oʻrganish davomida mahallada bolalar va yoshlarning boʻsh vaqtini mazmunli tashkil etish hamda sogʻlom turmush tarzini targʻib etishga qaratilgan sport inshootlari faoliyati koʻzdan kechirildi. Xususan, yoshlar uchun tashkil etilgan workout maydonchasi bilan tanishildi.

Maʼlum boʻlishicha, mahalla hududida yer maydoni cheklanganligi sababli mazkur workout maydonchasi hududdagi 2-sonli umumiy oʻrta taʼlim maktabi hududiga oʻrnatilgan. Ushbu maydoncha nafaqat maktab oʻquvchilari, balki mahalladagi yoshlarning ham sport bilan muntazam shugʻullanishi uchun qulay sharoit yaratmoqda.

Oʻrganish jarayonida mavjud sport infratuzilmasidan samarali foydalanish, uni asrab-avaylash hamda yoshlarni ommaviy sportga keng jalb etish masalalariga alohida eʼtibor qaratildi.

Xalq deputatlari Margʻilon shahar Kengashi deputatlari tomonidan saylov okruglarida aholi uchun yaratilayotgan shart-sharoitlarni oʻrganish, mavjud muammolarni aniqlash va ularning yechimini taʼminlashga qaratilgan ishlar davom ettirilmoqda.