Shu maqsadda Xalq deputatlari Termiz shahar Kengashi kotibiyati mudiri, deputat A.Ashurov hamda kotibiyat bosh mutaxassisi R.Mamashukurov Kengashning 18-“Mehrobod” saylov okrugi deputati B.Xollozov okrugiga qarashli “Mehrobod” mahallasida bo‘lib, mahalla faollari bilan uchrashuv o‘tkazdi.

Mazkur jarayon mahalliy Kengash deputatlari faoliyatining “24 ta eng muhim yo‘nalish” mezonlari asosida olib borilib, aholi muammolarini “xonadonbay” o‘rganish, murojaatlarni o‘z vaqtida ko‘rib chiqish va ularning yechimini ta’minlash masalalariga alohida e’tibor qaratildi.

Uchrashuv davomida mahalladagi mavjud holat, mahalla faollarining vazifalar ijrosi, aholi bilan ishlash samaradorligi, fuqarolar murojaatlarini o‘rganish hamda hududdagi ijtimoiy-iqtisodiy masalalarni hal etish borasidagi ishlar atroflicha muhokama qilindi.

Shuningdek, O‘zbekiston Respublikasi Prezidentining 2026-yil 24-iyundagi “Mahalla boshqaruvini samarali tashkil etishga oid qo‘shimcha chora-tadbirlar to‘g‘risida”gi PF–116-son Farmoni bilan belgilangan vazifalarning mahalladagi ijrosi tahlil qilindi. Mahalla institutining aholi muammolarini hal etishdagi rolini kuchaytirish va mahalla faollarining mas’uliyatini oshirish yuzasidan fikr almashildi.

Mahalla faollari tomonidan hududdagi ayrim muammolar, aholi taklif va murojaatlari yuzasidan ma’lumotlar berilib, ularni hal etish bo‘yicha tegishli takliflar bildirildi. Aniqlangan masalalarni mas’ul tashkilotlarga yo‘naltirish, ijrosini nazoratga olish va natijasi haqida fuqarolarni xabardor qilish zarurligi ta’kidlandi.

Yig‘ilish davomida deputat B.Xollozovning saylov okrugidagi faoliyati alohida tahlil qilindi. Jumladan, deputatning saylovchilar bilan uchrashuvlari, aholi murojaatlarini o‘rganishi, fuqarolar tomonidan bildirilayotgan taklif va muammolarni tegishli tashkilotlar oldiga qo‘yishi hamda ularning ijrosi yuzasidan deputatlik nazoratini olib borishi masalalariga e’tibor qaratildi.

Shuningdek, deputatning mahalla faollari va mas’ul tashkilotlar bilan hamkorligi, hududdagi ijtimoiy-iqtisodiy masalalarni o‘rganishi, saylovchilarning qonuniy manfaatlarini himoya qilish borasidagi faoliyati yuzasidan fikr almashildi.

Yakunda mahalla faoliyatini yanada takomillashtirish, belgilangan vazifalar ijrosini ta’minlash, aniqlangan kamchiliklarni bartaraf etish hamda aholi murojaatlari bilan ishlash samaradorligini oshirish yuzasidan tegishli tavsiya va topshiriqlar berildi.