Xalq deputatlari Bo‘stonliq tumani Kengashining 2026-yilga mo‘ljallangan ish rejasi hamda O‘zbekiston Respublikasining “Jismoniy va yuridik shaxslar murojaatlari to‘g‘risida”gi Qonuniga muvofiq O‘zbekiston Liberal demokratik partiyasidan saylangan deputat U.Aripbayev hamda kotibiyat xodimi N.Kurganova tomonlaridan tumanning “Chimboyliq” mahallasi Abulqosim ko‘chasida istiqomat qiluvchi fuqaro R.Zokirov murojaati joyiga chiqqan holda o‘rganildi.

O‘rganish natijasida murojaatchi xonadoni hududidan o‘tgan elektr tarmog‘i simyog‘ochi texnik jihatdan eskirgani hamda avariya holatiga kelib qolgani aniqlandi. Mazkur elektr simyog‘ochi har qanday vaqtda nosozlik yuzaga keltirishi, elektr ta’minotida uzilishlarga sabab bo‘lishi hamda eng muhimi, xonadon aholisi va atrofdagilarning hayoti hamda sog‘lig‘i uchun xavf tug‘dirishi mumkinligi qayd etildi.

Shu munosabat bilan mavjud holatni bartaraf etish, xavfsizlik talablarini ta’minlash va ehtimoliy baxtsiz hodisalarning oldini olish maqsadida eskirgan simyog‘ochni qisqa muddatlarda yangisiga almashtirish zarurligi ta’kidlandi. Bu borada elektr ta’minoti korxonasi mas’ullari ishtirokida texnik ko‘rik o‘tkazish va zarur chora-tadbirlarni tezkor amalga oshirish yuzasidan takliflar bildirildi.