Xalq deputatlari Bag‘dod tumani Kengashining 14-A.Ikromov saylov okrugi deputati D.Xamraqulov, Kengash kotibiyati mudiri G‘.Abdullayev hamda Kengash kotibiyatining bosh mutaxassisi A.Ismoilov tomonidan Do‘stlik mahalla fuqarolar yig‘inida “24 ta muhim masala” doirasida xotin-qizlar faolining faoliyati o‘rganildi.

O‘rganish davomida mahallada xotin-qizlarni ijtimoiy qo‘llab-quvvatlash, ularning bandligini ta’minlash, muammolarini tizimli hal etish, oilalarda sog‘lom ma’naviy-axloqiy muhitni mustahkamlash hamda huquq va manfaatlarini himoya qilish borasida amalga oshirilayotgan ishlar tahlil qilindi.

Ma’lum qilinishicha, mahallada jami 1 690 nafar xotin-qiz istiqomat qiladi. Shundan 119 nafari “Ayollar daftari”ga kiritilgan bo‘lib, 2026-yilning o‘tgan 6 oyi davomida 21 nafar xotin-qizga turli ko‘rinishdagi amaliy yordamlar ko‘rsatilgan.

Jumladan, 1 nafar xotin-qiz nonvoychilik, 1 nafar xotin-qiz chorvachilik yo‘nalishida kredit mablag‘lari ajratilishi orqali bandligi ta’minlangan. Shuningdek, 18 nafar xotin-qizga psixologik va huquqiy yordam ko‘rsatilib, ularning muammolarini bartaraf etish yuzasidan tegishli choralar ko‘rilgan. Bundan tashqari, xotin-qizlar faoli tomonidan olib borilgan profilaktik va tushuntirish ishlari natijasida 4 ta oila yarashtirilgan.

O‘rganish yakunida xotin-qizlar bilan ishlash samaradorligini yanada oshirish, “Ayollar daftari”ga kiritilgan fuqarolarni manzilli qo‘llab-quvvatlash, ularning bandligini ta’minlash, tadbirkorlikka jalb etish hamda oilalarda ijtimoiy-ma’naviy muhitni mustahkamlash bo‘yicha tegishli tavsiya va takliflar bildirildi.